Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Casu sardu, unu patrimoniu de sapores intre connottu e iscrocca.

Sa Sardigna est una de sas regiones italianas inube sa cultura de sos pastores est ancora biva e arradicada in manera funguda. Inoghe su casu non est solu un’ alimentu, ma su risurtadu de unu sapere antigu chi si trasmittit dae ingendras, ligadu a sos ritimos de sa natura, a sos masones e a sas bistas de s’isula.

Intre sas produssiones prus de importu bi est su Fiore Sardo, cussideradu unu de sos casos prus antigos de sa Sardigna. Benit fattu cun latte de berbeghe cruu e tribagliadu secundu tennicas antigas de su connottu, cun d’una affumada lebia chi li dat unu nuscu particulare. S’istasonadura, a s’ispissu longa, nde accreschet su sapore, faghindelu divennere detzisu.

Accanta a custu acciappamos su Berbeghinu Sardu, ispartu in totta s’isula e appretziadu meda po s’arranzu suo. In s’interpretassione prus zovana est prus delicadu e modde, mentres cun s’istasonadura divennit prus saporidu e adattu fintzas a essere rattadu. Est unu de sos casos chi menzus mustrat sa produssione sarda fintzas fora de sas lacanas regionales.

Importante meda est fintzas su Berbeghinu Romanu, chi, mancari pro su numene, benit produidu meda propriu in Sardigna. Est unu casu dae su tastu forte e salidu, impittadu mescamente in coghina, e d’est una de sas prus importantes esportassiones de s’agroalimentare de s’isula. Intre sas ispetzialidades prus particulares e discutidas bi est su Casu marzu, unu casu chi naschet dae unu protzessu de abbumbadura naturale particulare meda. Est ligadu a connottos antigos e fintzas oe bogat a fora curiosidade e dibattas, divenninde una cona de sas prus urtimas de sa cultura de sa coghina sarda.

Accanta a sos casos prus nodidos esistit posca una produssione prus pagu connoschida, ma atterettantu inportante. Su Crapinu Sardu apparat unu sapore prus diligu e nuscosu, mentres sas regottas prus friscas e istasonadas, a s’ispissu benint impittadas fintzas pro sos durches de su connottu, e sunt un’attera issida de sa ricchesa de sas casajas de s’isula.

Cussu chi faghet divennere unigos sos casos sardos no est solu su tastu, ma fintzas su logu in su cale naschent. Sas erbas ispontaneas, s’aera, sa libertade de pabarile e sas tennicas artesanales dant unu contribbudu a creare produttos divressos intre issos, ma semper ligados a s’iscrocca.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22