Mortoriu de sos cojuados Gulisano: incumintzadu su protzessu in Casteddu.

In su mese de Nadale 2024 in Casteddu sunt bistados mortos Luisi Gulisano e Marisa Dessì, maridu e muzere de 79 e 82 annos. Sos duos betzos sunt bistados acciappidos chena vida in sa domo insoro de sa bia Ghibli, in su cuartieri de su Sole.

Sa cramada est iscattada cando sos corpos sunt bistados iscopertos intro de sa domo. Secundu cantu pensant sos iscrucculladores, cussu sero calicunu depet aere giagardu sa cropa intre domo insoro. Sos duos diant essere bistados mortos pustis de essere bistados istrangugliados e attogados.

Pustis de essere bistados acciappidos sunt partidas sas iscruccullas pro cumprendere itte podet essere sutzessu e chie podiat essere su responsabbile de su mortoriu de sos duos. Sos iscrucculladores ant regortu testimonzas, controlladu sos elementos acciappidos intro de sa domo e controlladu sos urtimos movimentos de sos mortos.

Cun su passare de sas dies  s’attentzione de sos iscrucculladores si est cuncentrada supra su fizu de sa cropa, Claudio Gulisano, de 44 annos. Secundu chi est iscruccullande, in daesegus de su mortoriu bi diant podere essere motivos de dinari.

S’omine, difattis, paret chi tenzerat problemas de dinari giai dae tempus. Intre sas difficultades accolomicas bi diat essere bistadu puru su fallimentu de una buttega chi su babbu li aiat donadu annos prima e chi non fit resessidu a giughere a daenantis.

Propriu custas difficultades diant aere pottidu ispinghere s’omine a bocchire babbu e mama. Secundu s’accusa, su fizzu diat aere mortu babbu e mama cun s’intentu de alcansare s’eredidade e chircare gai de resorvere sos problemas accolomicos suos. In prus, pustis de sa morte de sos duos betzos, dae sos contos insoro diant essere bistados pigados casi 20.000 euros.

Gulisano est bistadu arrestadu in su mentres de sas iscruccullas e dae casi un’annu si acciappat in presone isettande su protzessu. In sa prima audientzia, s’omine at nadu de no essere bistadu issu a bocchire su babbu e sa mama. At peroe reconnoschidu de aere fattu errores meda pustis de aere iscopertu sos duos in sa domo insoro.

In su mentres de sa mattessi audientzia sa defensa at dimandadu chi carchi parte de sa perizia meiga-legale no esseret cussiderada in su protzessu ma sa dimanda est bistada reusa.

Su prtozessu at a sighire in sas chidas imbenientes, iscurtande sos testimonzos e cun s’analis de tottu sos elementos regortos in su mentres de sas iscruccullas. Sa prossima audientzia si prevedit po su 25 de
martu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Rebuseria manna de tassas de 1,6 miliones: secuestrados 800.000 euros intre Sardigna e Campania.

Unu secuestru preventivu de casi 800 mizza euros est bistadu fattu dae sa Guardia de Finantzia de Casteddu a unu buttegheri de bistires, chi pensant siat responsabbile de una rebuseria manna de tassas. Su provvedimentu at interessadu benes e dinari intre Sardigna e Campania, a s’accabbu de una attividade de iscruccullu particulare.

S’iscruccullu at bogadu a campu unu modellu fundadu supra s’impittu de fatturas farsas po prus de 1,6 miliones de euros.Secundu cantu narant sos finantzieris,s’omine diat aere postu intro de sa contabilidade ispesas mai fattas, cun s’intentu de minimare sas tassas chi deppiat pagare. Sas fatturas farsas diant aere permittidu de cumpensare sos incassos de s’attividade, minimande su chi beniat decraradu a sas impostas.

Eelementu tzentrale de su sistema, comente est bessidu a pizu, diat essere bistadu s’azzudu de paritzas sotziedades “pabilu”, chi esistiant ma non teniant unu logu in su cale bistare. Custas sotziedades, chi si acciappaiant intre Lombardia,Veneto,Toscana e Lazio, diant aere tentu sa faina de bogare a fora documentos farsos, chentza chi bi esserent servitzios beros.

Pro fruttare sa cosa in manera chi si poderet minimare s’arriscu de controllos antiriciclaggio, sas fatturas beniant fattas de importu prus bassos de 3miza euros. Sos pagamentos beniant fattos in dinari, escluidinde sa tracciabilidade de sa banca. Sa Finantzia, po mesu de accertamentos de sa contabilidade e de su patrimoniu, est resessida a ponnere manu a su tzircuitu accolomicu e connoschere sa cantidade de su chi aiant furadu. Su secuestru fattu dae s’Autoridade Giudissiaria serbit como po garantire su recuberu de s’inari chi ch’est bistadu leadu a s’istadu.

S’omine est iscrudignadu po decraratzione farsa po mesu de fatturas chi no esistint. Su procedimentu est in sas mamentu de sas iscruccullas a s’incumintzu e, comente prevedit sa leze, s’omine benit cussideradu innotzente fintzas a cando no at arribare sa cundenna deffinitiva.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22