Porto Cervo, serradas sas iscruccullas supra sa morte de Gaia Costa.

Sunt bistadas serradas sas iscruccullas supra s’irgianada morte de Gaia Costa, sa picciocca de 24 annos de Tempio trabentada s’8 de triulas de s’annu passadu in su mentres chi fuit rugande sas tziras pedonales de sa bia Aga Khan in Porto Cervo, cando si fuit pasande dae su tribagliu suo de baby sitter. Sa zovana fuit connoschida e amada dae tottus,po s’arrisu suo e sa disponibilidade assa parte de chie nde tenzerat bisonzu.

A rugare Gaia est bistadu unu SUV ghiadu dae Vivian Spohr, manager tedesca e muzzere de Carsten Spohr, amministradore delegadu de Lufthansa,in vacantzia cun sa famiglia in Costa Smeralda. Spohr est scruccullada po mortoriu istradale. Sos accertamentos tennicos supra su telefoneddu de chie fuit ghiande e su SUV sunt bistados fattos dae sa Procura de Tempio. Dae su controllu de cussu chi est sutzessu, con s’esamene puru de su video-controllu, bessit a pizu chi sa zovana fuit rugande sas tziras pedonales a sas 13 de manzanu cando su SUV at de bottu torradu a camminare, trabentandela.

Secundu sos cunsizzeris seperados dae su Tribbunale, sa tuccada de su SUV est motivada “cun donzi probabilidade dae una grae e sighida disattenztione de sa femina chi fuit ghiande, chi non si est abbizzada de cantu fuit sutzedinde a sa dresta sua, controllande solu s’andada in daenanti de sa macchina chi teniat in daenanti”. Sas iscruccullas escuidint chi sa disattentzione bi siat bistada po curpa de su telefoneddu o pro su motivu chi sa macchina eppat funtzionadu male, cunfirmande chi sa femina teniat sa prena visibilidade de sa zura inube bi fuit sa picciocca.

Oe, in su mentres chi sas iscruccullas sunt accabbadas, sa comunidade de Tempio sighit a pranghere sa perdida de Gaia. Zovana, lampante e sempre pronta a azzuare chie le bistaiat accanta, s’assentzia sua s’intendet in manera funguda in Porto Cervo e Tempio. In sas dies pustis de S’incidente sunt naschidas bogadas a campu po l’ammentare: fraccadas, addobios po l’ammentare e mamentos de preghiera chi ant bistu sa partetzipassione de amigos, connoschentes e tzittadinos aunidos in su dolore.

Fintzas in su Bastione de Casteddu, dae pagu ant mustradu una fottograffia sua  in su mentres de unu programma televisivu connoschidu meda. Gaia addurat in su coro de tottus comente una picciocca ispeciale, amada po sa bontade e su meledu suo luminosu, e sa memoria sua sighit a ispirare chie l’at connotta.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Mortoriu pustis de sa festa, un’omine de 26 annos cundennadu a 14 annos po su mortoriu de Assemini.

Si serrat cun d’una cundenna a 14 annos de presone su protzessu a carrigu de s’omine de 26 annos chi aiat cunfessadu su mortoriu de Alessandro Cambuca, s’omine de 27 annos mortu cun paritzos corpos de burteddu in su mese de Santu Aini de su 2024 in Assemini, in sa tzittade metropolitana de Casteddu. Su mortoriu fuit bistadu fattu intro de una domo inube su mortu e su chi l’at mortu fuint passande sa notte imparis cun atteros amigos, pustis de essere bistadosa sa festa de santa Greca in Decimo. Unu seru de festa chi si fuit trasformada in disgrassia in sas oras imbenientes a su cuccurale de una briga chi fuit finida cun s’affraccada mortale.

Sa sententzia est bistada fatta a s’accabbada de su protzessu tzelebradu in accurtziadu. In su cursu de s’urtima audientzia, in sa reprica, su Pubbricu Ministeru aiat dimandadu de dare un cundenna prus bassa, dae 17 annos e 4 meses a 14 annos e 8 meses. Su zuighe at istabilidu una pena de 14 annos de presone, riconnoschinde a s’imputadu sas abbrandadas cumpressivas.

Intre sos elementos cussiderados po sa detzisione bi sunt bistados sa cunfessione fatta dae su zovanu fintzas dae su primu mamentu e s’azzudu dadu a sos iscrucculladores, chi aiat permittidu de acciappare s’arma impittada po bocchire Alessandro Cambuca. Unu comportamentu chi at fittadu supra sa balutatzione de sa posissione sua in su protzessu. In su mentres de su dibattimentu, sa defensa aiat bogadu a pizu sa chistione de unu possibbile vissiu de mente a su mamentu de su mortoriu, presentande una perissia de parte secundu sa cale s’imputadu diat aere fattu in su mentres chi non fuit capatze de cumprendere e de bolere.

Una visura chi est bistada discutida in aula e at a podere essere oggettu de atteras balutatziones in sos atteros protzessos chi si ant a faghere.
Como si isettat su depositu de sas resones de sa sententzia, coladorzu de fundamentu po cumprendere in particulare sas resones chi ant giuttu a custa pena. Solu pustis de aere esaminadu sos motivos, sa defensa at a detzidere si presentare appellu contra sa cundenna de primu gradu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22