Sas caratzas de su Carrasegare pius famadas in Sardigna.

Su Carrasegare in Sardigna est una festa ricca de connottos e ritos antigos chi affundant sas raighinas in tempos antigos meda. In mesu de sos elementos pius ammaghiantes de custa celebratzione bi sunt sas caratzas de su connottu, donzuna cun d’una istoria e una cona unicas. Accò calicuna de sas pius celebres.

Sas caratzas pius conicas de su Carrasegare sardu sunt de sicuru sos Mamuthones e sos Issohadores, chi arribant dae Mamuiada. Sos Mamuthones bestint peddes de erbeghes pesantes meda e marratzos mannos supra s’ischina, mentres sa cara est ammuntada dae una caratza niedda e chi inchiettat. Su passu insoro, lentu e cadentziadu est s’ammentu de una danza rituale de su tempus passadu. Sos Issohadores, imbetze, bistidos de ruju e biancu, deppent “ acciappare” cun d’una fune sos ispettadores, un’attu de bonu auguriu.

In su Carrasegare de Otzana, acciappamos sas figuras de sos Boes e Merdules. Sos Boes chi affigurant sos boes, portant caratzas de linna chi parent animales e si movent in manera infruscada. Sos Merdules, invetzes, bestidos cun bistires poberos e una caratza umana mustruosa, tenent sa faina de domare sos Boes, mustrande su ligamene de s’omine cun sa natura.

Sos Thurpos(tzegos) de Oroteddi sunt figuras bestidas de nieddu cun d’unu cucuddu chi cuat sa cara prena de fumadigu. Custas caratzas mustrant sos massajos e sos pastores de sa Sardigna antiga, chi istrasinant un’aradulu immazinariu trazadu dae omines in cadenas. Est una affiguratzione de sa fadiga e de cantu fit tosta sa vida de sos massajos e sos pastores. Sos Urthos sunt omines-animales chi brincant e si fruschinant chircande de si liberare dae sas cadenas, affigurande sa lutta de s’omine contra sa parte agreste sua. Sos Buttudos, invetze, cun sas peddes insoro e sos marratzos, los controllant, in d’una manera simile a cussa de sos Boes e Merdules.

Un’attera caratza accisante est cussa de s’Urtzu, chi mustrat unu beccu forastigu, chi affigurat sa saliosidade, e su domadore suo, Su Omadore, chi tentat de lu tennere sutta de controllu. Sa danza isfrenada insoro affigurat su annoamentu de sa vida e de sa natura.

Donzi annu, custas figuras ammaghiantes torrant a carcare sas carrelas de sa Sardigna, donande a sos ispettadores un’esperientzia unica intre istoria e folklore.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sas Prendas Arkeològicas de Cràbas ant a èssere sas printzipales in Danimarca.

Unu pùbbricu meda e abbizosu at pigadu parte giòvia coladu a s’Istitutu italianu de Cultura de Copenaghen a s’addobiu dedicadu a sas prendas arkeològicas de Cràbas e a su Parcu arkeològigu naturale de su Sinis, cunfirmande s’interèssu forte internatzionale pro s’istòria e s’identidade de sa
Sardigna. S’initziativa, insertada in s’abbenimentu “Sardigna: s’istòria, sa trama” e fatta gràtzias a sa collaboratzione intre assòtzios culturales e
istitutziones, at rapresentadu una occasione importante de faveddu po bandire su patrimòniu sardu in fora de s’isula.

Sa serana at postu in lughe cantu siat importante contare sa Sardigna a foras de sos assettios regionales e natzionales, non solu comente logu turìsticu ma comente logu de tziviltades antigas, de iscobertas arkeològicas de importu internatzionale e de connottos culturales ancora arradigadas in manera funguda in su presente.

Po mesu de su contu de sos logos printzipales de su Sinis, dae Tharros a sa zura arkeològiga de Mont’e Prama, passande pro museos e logos chi
rappresentant s’iscrocca, su pùblicu danesu at pòtidu cumintzare unu viàzu ideale intre coladu e presente, cumprendinde su balore universale de unu
patrimòniu chi non apartenet solu a sa Sardigna ma a totu su cadinu de su Mediterràneu.

Accanta a s’arkeologia, logu meda est bistadu dedicadu fintzas a sas issidas artìstigas de oe, dae su tzinema a sas artes immaginativas fintzas a sa
mùsica, evidentziande comente sa cultura sarda non siat un’erèntzia cristallizzada in su tempus coladu ma una realidade bìva, capatze de si rennovare e faeddare cun su presente. Custu intrizu intre istòria e moda afortigat su nuntzu de una Sardigna chi cambiat, cabosa de sas raighinas suas e a su matessi tempus aberta a su mundu.

Abbenimentos comente custu dimustrant s’importu de sa cooperatzione intre istitutziones, assòtzios culturales in su fraigare caminos de balorizatzione cumpartzidos e chi durant. Leare sa cultura sarda a su forastigu cheret nàrrere difatis afortigare sos ligàmenes cun sas comunidades internatzionales, favoressere sa connoschèntzia pare-pare e dare unu contribbudu a una diplomàtzia culturael fundada subra su rispetu e s’iscàmbiu.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”