Sardigna imbiancada in su fine chida: fintzas a 50cm supra suGhennarghentu intre bellesa e dificultade

In su fine de chida sa Sardigna est bistada imboligada dae una froccada istravanada chi at revertidu s’ìsula in d’unu iscenàriu de jerru beru. In su Ghennarghentu sos ammuntonos sunt arrivados a sos 50 centímetros mentres in medas biddas de su tzentru sa nie est arrivada intre sos 10 e sos 20 centímetros, unu abbenimentu istravanadu, pro unu mese de sant’Andria, chi at donadu bistas de cartolina cun cunsighèntzias in sa vida de ogni die.

Sa nie at sighidu a ruere a palas a susu de sos 700 metros de artària, donande una bista alpina a sos logos de montagna, mentras in tzentros prus bassos comente Macumere e Biddanòa Tulo sa nie est abarrada in terra solu su note. Sa colada at tentu allentamentos e problemas: mezos iscopanie e
isparghidores de sale sunt bistados impreados in sas carrelas printzipales de sa Provìntzia de Nùgoro, ma calicuna carrela, mescamente cussas secundàrias o cun pendentzia manna, sunt abarradas perigulosas e astradas, causende discumbenios e allentamentos in su tràficu.

In calicuna comunidade de montagna sa nie at causadu isulamentu temporàneu, cun dificultades in sas tramudas e interrutziones de s’ elètritzidade o de sas lìnias telefònicas. Sos pesadores e sas famìllias de sas biddas de montagna ant devidu afrontare problemas cun sos animales e in sas atividades de donzi die, mentres calicuna iscola e servìtzios locales sunt bistados custrintos a firmare pro unu pagu sas atividades pro garantire sa siguresa. Sa situatzione pedetatentzione: chie depet biazare in sas zuras de s’internu si depet adressare de ammanios zustos, cansare ispostamentos non netzessarios e fàghere atentzione mescamente in sos passos de montagna.

In su mentres, sa màchina de sos succursos e su controllu de su pianu nie sunt operativas, cun mezos comunales e provintziales chi sunt tribagliande pro garantire sa colada de sas carrelas printzipales.

Su fritu cadriu s’est fatu intendere fintzas in sa campura: in sos ispuntones de su Ghennarghentu sa temperatura at tocadu sos -5°C, mentres in Casteddu sa temperadura de custu manzanu fiat de 5°C. Custa froccada, una de sas prus fortes pro unu sant’Andria sardu, at apparadu unu ispetàculu de jerru raru in s’ìsula, intre iscenàrios ispantosos e discumbenios chi ant postu a sa proa sa mobilitade e sa vida de donzi die de sos tzitadinos.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”

Su chervu sardu cona de una torrata a nachere de s’ambiente.

Su chervu sardu, connoschidu iscientificamente commente Cervus elaphus corsicanus, est una de sas castas pius ammaghiantes e de signifficu de sos animales de sa Sardigna. Tippicu de s’isula e de sa Corsica, custu animale si annodittat po sas mesuras prus pitticcas in cunfrontu a su chervu europeu e po su abbrigu fuscu chi cambiat tonalidade cun sas istajones. Po seculos at bividu in sos buscos e in sas magras mediterraneas de s’isula diveninde parte de sa bista naturale e de sa cultura locale.

In su Noighentos su chervu sardu at arriscadu de si estinghere pro more de sa cazza estremada e de sa minimada de sos logos in sos cales biviat. A sa fine de sos annos Sessanta nde adduraiant solu pagas chentinaias de tipos cuncentrados mescamente in sa parte de bassu de s’isula. Dae cussu mamentu sunt bistados incumintzados programmas importantes meda de tutela e accreschimentu chi ant permittidu a s’ispecie de torrare a occupare zuras mannas de sa Sardigna.

Oe su chervu sardu est presente in medas zuras de sos montes e corongias commente su Sulcis,su Sarrabus,S’Ozzastra e su Gennargentu. Bivet in logos riccos de buscos de elighes e magras mediterraneas, inube agattat furriadorzu e cosa de pappare. Pappat meda erba, fozzas,chimizones e fruttos,isboddiande unu rolu de fundamentu in s’ecchilibriu de sos ecosistemas forestales.

Una de sas cosas pius ammaghiantes de sa vida de su chervu sardu est su tempus de sos amores chi est in attonzu. In custa fase sos mascros bogant a fora boghes potentes po giammare sas feminas e appartare sos atteros mascros. Custu fenomenu nadurale faghet arrivare donz’annu appassionados e istudiosos, apparande un’ispettaculu unicu in sos buscos sardos, de cuntattu mannu.

Sa torrada de su chervu sardu no est solu unu sutzessu biologicu, ma puru unu signale importante po cunservare s’ambiente. Sa presentzia sua cunfirmat sa salude bona de sos ecosistemas e dat unu contribbudu a sa balorizzatzione su patrimoniu naturale de s’isula. In medas zuras su chervu est divennidu fintzas unu elementu de attrassione po su turismu naturalisticu e de ecchilibriu ecologicu. Subra de custa ispecie sunt bistados pubbricados puru paritzos libros fotogiornalisticos dae domos sardas chi lu cheriant evidentziare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22