Sa Sardigna chi faeddat a su mundu: sos chimbe iscritores pius famados de s’ìsula.

Sa Sardigna est unu logu chi at tentu literados de valore mannu, capatzes de faeddare a su mundu intreu. Sa pius connota est Gràssia Deledda, nàschida in Nugoro. Issa at bìnchidu su prèmiu Nobel po sa literadura in su 1926. Est s’ùnica fèmina in totu s’Itàlia a àere bìnchidu custu prèmiu.
At iscritu lìbberos inube at contadu de sas biddas de Sardigna, faghìnde- las a connòschere in totue.

Gai e-totu nugoresu fuit Sarbadore Satta, jurista e iscritore. Est issu chi at iscritu “Il giorno del giudizio”, unu de sos menzus lìbberos de su Noighentos, chi faeddat, comente chi siat faghinde una pintura, de sa zente de su cussu tempus. Zosepe Dessì, nàschidu in Biddexidru in su 1909, at bìnchidu su prèmiu “Strega” cun “Paese d’ombre”, lìbberu chi contat sa Sardigna de su connotu e de su tempus modernu.

In tempos pius bighinos a nois, b’est Sergio Atzeni, chi est nàschidu in Casteddu. Sos lìbberos suos ant rinnovadu sa literadura sarda. Tocat de montovare su lìbberu “Passavamo sulla terra leggeri”, chi aunit su mito, s’istòria e su tempus de oe.

Michela Murgia, chi fuit crabarissa, at iscritu “Accabadora”, chi faeddat de una Sardigna simbòlica e misteriosa. Michela Murgia in sa vida sua at faeddadu semper de polìtica e deretos de sa zente, e gai est istada connota in totu s’Itàlia e non solu. Custos chi amos montovadu sunt chimbe iscritores diferentes, chi si aunint po àere tramudadu sa cultura sarda a intro de unu limbazu universale, mustrande chi s’ìsula nostra est raighina e metafora de su mundu.

Sos lìbberos insoro nos faghent a cumprèndere comente sa Sardigna, mancari siat a un’ala de s’Europa, est su logu de mesu de sa literadura e de sa cultura. A lèzere sos lìbberos insoro non cheret nàrrere solu a iscobèrrere sa cultura sarda, ma cheret nàrrere fintzas a si fàghere preguntas universales de sa vida, de su connotu e de s’identidade.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

In Barbagia, su Carrasegare de Gavoi si annoddittat dae semper po una particularidade chi lu rendet unicu in sa bista de s’isula: inoke sa caratza non est uni bisu cuzigadu, ma su sonu. A faghere divennere unica sa festa non sunt costumenes iscenograficos o friguras de linna, ma su ritmu potente de sos tumbarinos e sos cantos de sos istrumentos de su connottu chi rugant sas carrelas de sa bidda. Custa tzelebrassione est sighida meda e attrait in sa biddichedda bisitadores meda.

Sas tzelebrassiones incuminzant in su Giovedì Grasso, connoschidu comente Giovja Lardajola, die chi marcat s’incumintzu uffitziale de sa festa e muttit sa comunidade a inghiriu de sos sapores tipicos de su connottu. Dae cussu mamentu, Gavoi si animat cun sos sonadores, muttidos tumbarinos, chi rugant su tzentru istoricu cun su bistire barbaricinu de su connottu. Sa colada insoro est abbisada dae su battidu detzisu de su tumbarinu, tamburu fattu cun pedde animale, accumpanzadu dae su sonu acuthu de su pipiolu,launedda de canna, e dae su ritmu metallicu de su triangulu.

No esistit una isfilada ordiminzada in su sensu classicu de sa paraula: tottu sa bidda divenit unu cataffale spontaneu. Sa musica s’isparghet intre sas carrelas e sas pratas, bintrat in sas domos e chentinas, inube sos sonadores benint accollidos po sighire sa festa intre ballos e mamentos de sotzialidade. Est una tzelebrassione chi transat tottas sas ingendras e chi rennovat donz’annu su sensu de appartennentzia a sa comunidade.

In su tempus passadu, intre sas friguras chi mustraiant su carrasegare bi fuit fintzas Zizzarrone, unu maimone chi mustraiat s’ispiritu isberrittadu de su tempus de su carrasegare. Oe sa presentzia sua est prus pagu tzentrale, ma addurat parte de s’immaginariu de tottus ligadu a sa festa.

Fintzas in custa dies, su Carrasegare de Gavoi est bistadu tzelebradu cun partecipassione manna, ghirande in sas carrelas de sa bidda s’energia de sos tumbarinos e cunfirmande su ligamene forte intre connottu e identidade locale, in d’unu cuntestu regionale inube atteros logos sunt nodidos  po sas caratzas rituales, Gavoi sighit a si annoddittare revertinde su sonu in s’eroe beru de su Carrasegare, un’elementu capatze de contare s’istoria e s’anima de sa Barbagia.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Il video di Maria Grazia Marras

.