Fèmina isparida in Caddura: b’at duos indagados, unu po l’àere morta.

Sa procura de Tèmpiu at abertu un’inchiesta subra de s’isparèssida de Cinzia Piras, una fèmina de 33 annos de Casteddusardu. Non s’ischit pius nudda de issa dae su sero de s’11 de capidanni, die chi issa fuit in Palau. A pustis de duas chidas chi b’at istadu indagines meda, sa zustìssia narat chi sas neghes potant èssere de duos òmines.

Unu de custos duos òmines lu sunt acusande de l’àere morta. S’àteru, invetze, est acusadu de àere cuadu sa carena morta de sa fèmina. Si pensat chi ambos duos esserant paris cun Cinzia su sero chi issa est isparida. Sa cosa est de importu mannu. Mèrculis coladu, sos carabineris sunt intrados a una domo in su sartu de Palau. Custa domo resurtat de possessu de unu de custos duos òmines. Incue fuint chircande si podiant agatare arrastos de cust’isparèssida. Po como non s’at agatadu pius de tantu.

Chi Cinzia mancherat l’ant nadu sos parentes suos. Su 12 de capidanni, infatis, ant comintzadu sa chirca de sa fèmina. Sa sorre nd’at prenadu su logu in totue, isperande chi calicunu poterat dare novas bonas. Mancari la chirchent in donzi parte e logu, po como no l’ant agatada. S’isparèssida de Cinzia Pinna at lassadu a sa muda totu Casteddusardu e totu sa Caddura. Donzi die s’isentant novas, ma paret chi non bi nd’apat. Sa zustìssia at su pensamentu chi Cintzia siat istada morta, ma po como non s’agatat sa carena sua. Duncas, po custu, sa famìlia de Cinzia at ancora isperu de l’agatare bia.

Totu Casteddusardu e totu sa Caddura sunt a pensamentu mannu, ma sunt puru chircande de dare cunfortu a sos parentes de Cinzia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Blackout in su Prontu Succursu de su Santissima Trinidade: un’interrogu a su Ministru de sa Salude.

Su blackout chi at interessadu su prontu succursu de s’ispidale Santissima Trinidade de Casteddu sighit a faghere discutire e sustentare unu cunfrontu politicu istitutzionale allummadu meda. S’accadimentu, chi at postu in difficultade manna unu de sos printzipales ispidales de sa tzittade, at fattu narrere su parrere suo a Ugo Cappellacci, presidente de sa cummissione Affares Sotziales e Salude de sa Camera de sos Deputados, chi at comunicadu sa presentatzione de un’interrogu in su Parlamentu a su Ministru de sa Salude, Orazio Schillaci.

Secundu cantu pensat issu, cantu est sutzessu est grae meda, non solu po sas conseguentzias supra s’attividade de su Prontu Succursu, ma puru pro itte si inficchit in d’unu cuntestu prus mannu de crititzidades ligadas a su controllu de sa sanidade regionale. S’ex presidente de sa Regione Sardigna at gameddadu su chi est sutzessu a cussa chi at deffinidu una fase forte de istabbilidade politiga e amministrativa, annodditada dae seperos de guvernu cuntestados e dae una situassione de dudesa chi, po comente la pensat issu, si reflettit derettu supra sos servitzios essentziales.

Su blackout at provocadu sa frimmada de s’energia elettrica e sa frimmada de medas servitzios de fundamentu. Intre sos problemas printzipales signalados bi est bistada sa mancantzia de funtzionamentu de ordinzos netzessarios comente sa Tac, elementu tzentrale po sas
emergentzias. Sa frimmada de custos istrumentos at tentu unu corpu derettu supra s’operatividade de sa sezione.

S’assistentzia sanidaria est bistada garantida solu gratzias a sos sistemas de emergenztia, ma cun d’una difficultade manna. Sa situassione at tentu problemas supra sas curas, sos tempos de interventu e supra sa calidade cumplessiva de s’assistentzia. Propriu po accomettare a s’impossibilidade de operare in prenu, medas malaidos che sunt bistados leados a sos atteros prontu succursos tzittadinos, in manera particulare a su policlinicu de s’Universidade e s’ispidale Brotzu, ispidales chi giai dae tempus operant in cundissiones de aggravamentu po more de sa mancantzia de pessonale, lettos e benes.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22