Andria Parodi, sìmbulu de sa Sardigna e boghe chi nos mancat ancora oe.

Andria Parodi abbarrat unu de sos cantadore e musicistas pius bene crèfidos de sa Sardigna, sìmbulu de un’ìsula chi cantat s’identidade e sa cultura sua a mèdiu de sa mùsica. Andria est nàschidu in Casteddu in su 1967 e at ischidu betare a pare connotu e modernidade, faghinde appretziare su patrimòniu musicale sardu a unu pùblicu natzionale e internatzionale gràssias a sa boghe sua, potente e ùnica.

Sa carriera de Parodi est comintzada cun sos Tazenda, unu sòtziu chi at mudadu meda su panorama musicale sardu cun unu sound chi est ùnicu e capatze de ammesturare folk, rock e sonoridades sardas. Sa boghe sua est divènnida luego comente una marca de fàbrica de unu sòtziu chi at ischidu contare sa Sardigna a manera autèntica e contemporànea. In s’andare de sos annos, Parodi at poi cantadu a sa sola, sena sos Tazenda, ma a bortas cantande puru cun cantadores italianos e istranzos, semper però cun unu ligàmene mannu cun sa terra sua.

Parodi no est istadu unu musicista ebbia, ma est istadu puru unu tistimonzu de sa cultura sarda. sas cantones suas nos contant istòrias de sa vida de cada die, memòria de su connotu de totus chi at raighinas profundas, diveninde puru comente a unu ponte dae su tempus coladu a su presente. Si nch’est mortu chi non fuit betzu ancora, in su 2006, e nos at lassadu un’arrastu mannu in sa mùsica sarda, ma finztas in sa mùsica italiana. Sa boghe sua, ancora oe, sighit a cantare in sos ammentos de totus chi li torrant gràssias mannas po cussu chi at fatu po s’ìsula nostra.

Oe, Andria Parodi est unu esèmpiu mannu po sos cantadores e musicistas noitolos puru, est unu mastru mannu, unu sìmbulu de totu canta sa Sardigna. Festival, cuntzertos de tributu e regortas chi ant fatu a pustis de sa morte sua nos faghent a cumprèndere cantu mannu siat s’ereu artìsticu e culturale sou, chi est meda pius mannu de sas nodas musicales suas. Totu custu est sinnale mannu de cantu issu siat istadu ambassadore de sa Sardigna in totu su mundu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Nule e s’arte de su tessere: un’identidade chi leat forma intre connottu e tempus benidore.

In su coro de sa Costera, Nule, paisu de casi 1.300 abitantes, seperat de contare issu mattessi po mesu po mesu de una de sas cosas prus berteras: sa tessidura. Dae su 20 de Nadale 2025 a su 31 de Bennarzu 2026 su tzentru si faghet logu de contassia e de creazione cun sa mustra”T’essere-esistere,non finito,finito” unu disignu culturale chi ponet a su tzentru su tribagliu, sa bisione e sa memoria de sas mastras tessidoras de Nule.

Sa rassigna est curada dae s’architetto Angelo Ziranu e naschet dae sa voluntade de s’amministratzione comunale po balorizzare su patrimoniu de s’identidade de su paisu po mesu de unu percursu chi aunit connottu, tempos de oe e afficcos de isviluppu. Sa tessidura benit proposta non solu commente espressione artistica, ma commente seperu de vida, pratiga de donzi die e ischire chi sighit a si rennoare in su tempus.

Su coro de su disignu est mustradu dae su tribagliu de sas tessidoras intro de un’istanzia-museu cun d’unu telarzu, pensada commente istallatzione abbarrante e a su mattessi tempus attivu. Non unu logu frimmu, ma una buttega abberta, unu “work in progress”  in su cale su gestu artesanu si mustrat in sa bertera sua, divenninde esperientzia biva po su pubbricu. Su telarzu, istrumentu chi contat, divenit gai logu de contu e de relatta, capatze de torrare su balore fungudu de su faghere.

Sa mustra comunicat in manera deretta e moderna sa possibilidade de cussiderare sa tessidura commente unu tribagliu fintzas oe, unu caminu possibile po chie disizzat de si accostare a custu mestieri commente seperu de vida. Intre su tempus de sa mustra sos bisitadores ant a podere sighire sa naschida de su tappettu “non finidu”, castiande sa creschida de donzi die sutta sas manos de sas artesanas, fintzas a s’accabbada sua, cando su fattu a manu “finidu” at a divennere sintesi bisiva e ideale de su disignu intreu.

Intre sos intentos tzentrales de sa mustra bi est puru cussu de affortigare sa visibilidade de su tappettu de Nule e de sas tessidoras suas a livellu nazionale e internatzionale. Sa rassigna est accumpanzada dae unu calendariu prenu de appuntamentos chi attraessat sas festas e s’incumintzu de s’annu novu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22