Sa Basiliga de Saccargia: pedra, fide e paristoria in su coro de sa Sardigna medievale.

In su coro de s’adde de Codrongianos, intre sos campos de sa Nurra tattaresa, s’istantariat sulenne e solastiga sa Basiliga de sa Santissima Trinidade de Saccargia, unu de sos monumentos romanicos-pisanos pius tzelebres e ammaghiantes de tottu sa Sardigna. Unu logu chi accisat po s’armudiu de sas formas suas, sa fortza e s’istoria sua e sa bellesa chi resistit a su tempus.

Fraigada in su 1116 po bolontade de sos zuighes de Torres, sa basiliga est una de sas testimonzias pius reffinadas de su romanicu in Sardigna, fruttu de sas influentzias toscanas e locales, e immagine de su tempus in su cale s’isula fuit a su tzentru de iscambios religiosos, politicos e culturales cun s’Italia continentale, importantes meda.

Sa parte de fora de sa basiliga est cussu chi nos collit po primu: unu giogu de cuntrastos reffinadu intre sa pedra carchina e sa preda molina tanada, chi trassat motivos geometricos e arcos zegos, creande un’ecchilibriu de sa bista unicu in s’architettura sarda. Su campanile a bela, artu e affraccadu, s’istantariat supra sa bista de su logu, testimonzu mudu de seculos de istoria.

In sa parte de intro, sa cresia custoit un’aera severa e cadria. Ma su chi pius ammaghiat est sa filera de pinturas a friscu assidales, fattas dae mastros toscanos in sa secunda metade de su seculu XII: un’esempru raru meda de pintura romanica in Sardigna, chi affigurat momentos de sa vida de Gesusu e de sa Virgine cun d’unu limbazzu visuale potente e derettu, e chi est ancora capatze de creare emossione.

Comente donzi logu sacru chi si rispettet, puru Saccargia tenet sa paristoria sua. Si contat chi inoghe, propriu inube oe bi est sa basiliga, un’acca braxa-“s’acca argia”, in sardu- si imbrinugherat donzi mdie addaenanti a una scaparatta votiva. Unu signu divinu chi diat aere cumbinchidu sos zuighes de Torres de fraigare in cussu puntu una cresia dedicada a sa Trinidade. Su mattessi nomene, “Saccargia”, diat bennere propriu dae cussa paristoria.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22