“Sindacopoli”, assolutzione de su tottu in Appellu: derruet su casteddu de accusas.

Una bortada istallida torrat a iscriere s’istoria de su protzessu “Sindacopoli”,chi in sos urtimos annos aiat iscuttinadu sa Sardigna, creande suspettos e condierras supra unu presumibbile intritzu de piagheres intre politica, amministrassione pubbrica e mundu de sas dittas. Sa Corte de Appellu de Casteddu at assolvidu tottu sos accusados, bortulande de su tottu sa sententzia de primu gradu chi aiat bogadu a fora su Tribbunale de Aristanis

Sos zuighes sunt bistados craros meda: “ Su fattu non bi est bistadu”. Sa detzisione sinzat unu cambiu de linea importante in cunfrontu a sa prima sententzia, chi aiat dadu penas pesantes meda po meda casos de piagheres ligados a porfias de appaltos,afficos e disignos pubbricos. A su tzentru de sas accusas, unu sistema presumidu de pretzebbos e piagheres chi diat aere interessadu amministradores locales, tennicos e meres de dittas chi tribagliaiant in medas comunes de sa Barbagia.

Assolutzione prena po tottu sos printzipales imputados de su protzessu. Sarbadore Pinna, inzenieri e mere de sa Essepi Engineering, in primu gradu fuit bistadu cundennadu a 7 annos e 6 meses po duos casos de piagheres. Cun issu, sunt bistados assoltos puru Rinaldo Arangino, ex sindigu de Belvì, a su cale aiant dadu 6 annos de presone, e Pier Paolo Sau, ex sindigu de Tonara, chi aiat tentu una cundenna a 4 annos e 3 meses.

Sa Corte at puru decraradu chi fuit passadu tempus meda po un’attera accusa chi interessaiat Pinna, Arangino e Pedru Crobu, ex vicesindigu de Ortueri, issu puru cundennadu  in primu gradu a 4 annos e 3 meses. S’apparitzu de sa sententzia est bistadu retzidu cun assulenu e suddisfassione dae sas defensas, chi dae tempus meda cuntestaiant sas accusas deffinindelas “ chidrinas e brivas de proas”. Cun sa pronuntzia de sa Corte de Appellu, su protzessu si serrat cun nudda de fattu po s’accusa, chi invetzes aiat contadu una retza ordiminzada bene de barattu de piagheres.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Listas de isettu in Sardigna: sa porfia de sa responsbilidade de tottus.

Sa Regione Sardigna est accomettande una porfia de signifficu ligada a sas listas de isettu longas in su servitziu sanidariu pubbricu. In sos primos ses meses de cust’annu bi sunt bistadas pius de 125.000 disdettas, cun casi su 30% fattas a s’urtimu momentu. Su chi affuscat de pius est su numeru de tzittadinos chi no si sunt presentados a sos addobios, casi 60.000.

Custos numeros evidentziant cantu siat importante su rolu de sa responsabilidade de donzunu po ottennere unu sistema sanidariu de balidia. Sa salude pubbrica dipendet no solu dae s’organissasione de sas contesturas e dae sa disponibilidade de su personale, ma fintzas dae su traju de sos tzittadinos. Donzi addobiu perdidu o annuddadu a s’urtimu minutu tenet conseghentzias beras, privande atteras pessonas de sa possibilidade de retzire curas in tempos lestros e poninde a rischiu s’ecchilibriu de su servitziu sanidariu.

Sa Regione at cuviadu paritzos interventos po accomettare sa situatzione, puntande supra istrumentos digitales pius de balentia, telefonadas po cunfirmare sas visitas e listas attivas, agendas fintas chi permittint de torrare a assinzare sos postos chi no sunt disponibiles in pagu tempus. Bi ant essere puru camminos de prenotassione dedicados a sos malaidos oncologicos e cronigos, cun s’intentu de garantire curas lestras a chi nde tenet pius bisonzu.

Sa muda de sas listas de isettu ponet s’attentzione supra s’importantzia de una sanidade chi siat atzessibile, responsabbile e cundivisa. Unu sistema sanidariu pubbricu funtzionat solu si chie nde faghet parte nde rispettat sas regulas,partetzipande po mezorare sos benes disponibiles. Su controllu sciente de sos appuntamentos divenit duncas no solu un’attu personale, ma unu contribbudu a sa comunidade e a su dirittu de fundamentu de donzunu de retzire curas balidas. Imbestire in sa sanidade cheret narrere imbestire in sa vida de tottus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22