Casteddu, incumintzadu su retiru de s’istiu in Ponte di Legno: partit s’istagione 2025/2026.

S’istagione nova de su Casteddu Fubbalu est partida in manera uffitziale. S’isquadra ruju blau si est acciappada deris in Ponte di Legno, in provintzia de Brescia, po su retiru prima de su campionadu, primu puntu de su caminu a conca de s’istagione 2025/2026. Un’addobiu de su connottu ma chi est semper carrigu de signifficu, chi sinzat s’incominzu de unu mamentu novu, custa borta ghiadu dae Fabio Pisacane, giammadu a iscriere una pazina nova in s’istoria reghente de su club.

Pustis de s’arrivu a s’aeroportu de Milano Linate a manzanu, sa cambarada ruju e blau at sighidu su biazu in pullman a conca de sa Val Camonica, segudande sa localidade in mesu de sos montes appena passadu mesudie. A ora de sas 13, s’isquadra est arrivada in s’Hotel Blu Acquaseria, cuarteri generale po totta sa durada de su retiru, chi at a accabbare su 22 de triulas.

A los ispettare, mancari su tempus esserede intzertu, casi trinta tiffosos chi ant accolidu s’isquadra e s’istaff cun tzoccamanos,cussertos e bandelas ruju e blau.Non sunt mancados sos selfies, sas frimmas e sos primos cambios de ciascas cun sos giogadores, cuntentos de intendere a sa lestra su carinnu de su populu casteddaggiu, fintzas attesu dae s’isula.

Sa truppa isquadra est casi cumprida. S’unicu chi mancaiat est su colombianu Yerry Mina, chi at a arribare sas dies bintrantes. Sa mancada partentzia sua cun sos atteros cumpanzos fuit giai bistada programmada po motivos personales. Po tottu sos atteros est giai tempus de torrare a tribagliare supra su campu: si partit cun sos primos allenamentos, test po su fisigu e accorradas tennicas po incumintzare a fraigare sas bases po s’istagione nova.

Pisacane e s’istaff suo ant a tennere pagu pius de una chida po baludare sas cunditziones fisigas de sa rosa, tribagliare supra s’identidade de giogu e intregare sos chi sunt arrivados cust’annu. Se retiru at essere puru s’occasione po carchi zovanu de s’isquadra de su Beranu de si faghere biere e chircare logu in sa truma de sos “mannos”.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sardigna in daesegus in sa classifica supra su clima e calidade de sa vida.

Su clima podet fittare supra sa calidade de sa vida in sas tzittades e sos datos prus reghentes lu cunfirmant fintzas pro sa Sardigna. In sa classifica de sas tzittades printzipales pubbricada dae su Sole 24 Ore, chi controllat sas cundissiones climaticas e su corpu supra sa vida de donzi die, carchi tzittade de s’isula si agattat in sa parte prus bassa de sa classifica natzionale.

In manera particulare est Carbonia a serrare sa classifica cun su 107° postu, s’urtimu intre sas tzittades printzipales esaminadas. S’istudiu leat in cussiderassione paritzos trattos de su clima pro cumprendere cantu sas cundissiones meteo potant influentzare su benessere de sas pessonas e sa vivibilidade de sos tzentros de sas tzittades. S’analisi si accottat supra 15 motivos ligados a su clima. Intre custos bi sunt s’intensidade de s’abba, su numeru de sas nottes in sas cales sa temperadura minima non calat sutta sos 20 grados, sas dies de cardu urtimu, sa presentzia de bentu in su mentres de s’istiu e s’umidesa de s’aria.

In su casu de Carbonia, secundu sos datos regortos, pesant mescamente sas temperaduras artas meda registradas in s’annu e su numeru minimadu de dies frittas o cun abba allongada. Custas cundissiones climaticas fittant supra su risurtadu finale de sa tzittade de su Sulcis chi si acciappat duncas a s’urtimu postu de sa classifica.

Est importante evidentziare chi s’istudiu si relatat a sos datos de su 2025 e non tenet contu de cantu accadessidu in sos primos meses de su 2026, cando totta sa Sardigna est bistada interessada dae una simana de abba prus bundante in cunfrontu a sa media de sos urtimos annos.Una cosa fora de norma de su clima chi at distintu s’incumintzu de s’annu ma chi non recuit in s’analisi impittada po faghere sa classifica.

Abbaidande su restu de sa classifica si nodat chi a sos primos postos si agattant mescamente tzittades supra su mare Adriaticu. A su primu postu de sa classifica bi est Bari. Sa classifica evidentziat comente su clima siat divenninde un’elementu semper prus importante cando si faeddat de calidade de sa vida in sas tzittades. Sas temperaduras artas meda, sos periodos de assuttura o a su contrariu de abba meda sunt cosas chi fittant supra sa salude, s’ambiente e supra sa vida de donzi die de sas pessonas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22