At binchidu sos duos miliones de bisualissassiones su video pubbricadu supra sos canales social uffitziales de ExpoItalia e dedicadu a sos Zigantes de Mont’e Prama, interpretes de sa partetzipassione italiana a s’Expo 2025 de Osaka. Unu sutzessu chi cunfirmat s’interessu internatzionale mannu po custos istravanados testimonzos de s’antiga tzivilidade nuragica.

Sas istatuas, presentes in Giappone cun battoro copias in 3D, in mesu de sas cales sas conas Efis e Gherreri, che sunt bistadas leadas a Osaka gratzias a s’interessamentu de sa Fundatzione Mont’e Prama, chi at curadu donzi partigulare de su disignu apparadu. “ Unu elementu chi testimonzat s’attentzione internatzionale manna po custa importante testimonia de s’istoria”, at nadu Mario Vattani,cummissariu istravanadu po s’Expo.

Po Antony Muroni, presidente de sa Fundatzione Mont’e Prama, est unu risurtadu desampladu, fruttu de una cooperassione forte intre istitussiones e cultura. “Sos Zigantes sunt su coro chi toccheddat de un’esperientzia chi tzelebrat su faeddu intre passadu e tempus de oe”, at nadu. Muroni at puru ammentadu comente, cun dinari propriu, sa Fundatzione eppat assiguradu fintzas s’ispeditzione de sas pedras sonantes de Pinuccio Sciola, issas puru in mustra in Osaka e accasazzadas cun interessu mannu dae su pubbricu.

Sa partetzipassione de sa Fundatzione Mont’e Prama a s’Expo faghet parte de unu disignu de tres annos partidu in su mese de nadale de su 2024 in s’ambasciada italiana de Tokyo e finantziadu de su tottu dae sa Fundatzione de Sardigna. Su caminu culturale at andare a daenanti fintzas a su 2026, cun s’intentu ambitziosu meda de che leare sos Zigantes in d’una de sas pius de archida realtades museales  de Tokyo.

Galabera e partetzipassione ant marcadu fintzas s’abbenimentu accasazzadu in “Domo Sardigna”, in su mentres de sa serana dedicada a s’iscrocca e sas dittas de s’isula.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Morta 30 annos faghet in Casteddu,su cunsillu puntat a unu mortoriu.

Trint’annos pustis de sa morte de Manuela Murgia, sa picciocca de 16 annos acciappida chentza vida in su canyon de su campusantu de Tuvixeddu in Casteddu su 5 de frearzu 1995, sa famiglia sua sighit a chircare veridade e zustissia. In primis si pensaiat chi si esseret morta, ma su casu est bistadu torradu a abberrere su 30 de martu 2025.Como est bistadu presentadu unu cunsillu novu chi negat sas congruidas de su RIS e puntat a cunfirmare chi Manuela diat podere essere bistada bocchida.

Su cunsillu de su Dr. Roberto Demontis, anatomopatologo, si cuntzentrat supra battoro puntos printzipales. Su primu po sas iscanniduras de Manuela:secundu su duttore non podent essere bistadas fattas po una rutta dae 30 metros, comente si pensaiat, e duncas s’idea chi si siat morta est meda diffitzile de creere.

Su secundu puntu pertoccat sa tzintura de sa picciocca: sa fibbia mustra sinzos de tira, comente si calicunu la diat aere tirada, e custu non diat ispiegare una rutta a sa sola. Su terzu puntu pertoccat sos oggettos pessonales de Manuela e carchi pranta acciappida accanta a su corpus: secundu Demontis non sunt coerentes cun su logu in su cale est bistadu acciappidu su corpus, e custu faghet pensare chi che siat bistadu leadu inie.

Po finire, su quartu puntu pertoccat sas iscanniduras intro de su corpus, chi secundu su duttore diant podere essere bistadas fattas cun d’unu imbestimentu de una macchina, abberinde iscenarios divressos meda dae cussu chi si pensaiat. Sa famiglia de Manuela pensat chi custos battoro puntos affortighent s’idea chi sa picciocca siat bistada morta e isperat chi custa analisi nova potat finamente faghere bessire a pizu sa veridade. Su cunsillu est unu elementu importante po faghere lughe supra una muda addurada misteriosa po trint’annos, e evidentziat comente siat ancora oe possibbile revertire pensamentos chi pariant deffinitivos.

Como sa detzisione finale est de su P.M., chi at a deppere baludare si nomenare unu super espertu po controllare un’attera borta su casu e abberguare sas ideas novas. Pro sa famiglia custu diat podere rappresentare unu passu detzisivu po alcansare rispostas, serrare unu capitulu prenu de dolore e dare zustissia a una vida zovana rugada troppu chitzo. S’isperantzia est chi, pustis de trint’annos, Manuela potat finamente tennere sa zustissia chi mereschet.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22