Casteddu, oras cardas supra su mercadu: Caprile, Piccoli e Adopo sunt in pagu ecchilibriu. Arribat Angelozzi.

Dies de ammacchiu in domo Casteddu, inube si detzidit su tempus benidore de tres giogadores importantes de s’istagione passada: Caprile, Piccoli e Adopo. Su club ruju blau at tempus fintzas a cras po los riscattare, ma su carrigu accolomicu de s’operassione- de casi 24 miliones de euros,imponnet cunsideros attentos e assiones pretzisas.

Su porteri Caprile, in manera particulare, est un’occasione de mercadu: si podet riscattare po 8 miliones dae su Napoli, e at bidu su balore suo artziare in artu pustis de un’annu bellu meda. Paritzas sotziedades, fintzas de Serie A, sunt sighinde cun interessu comente at andare sa chistione.

Pius cumplicada sa situassione cun s’Atalanta po Piccoli e Adopo, chi tenent unu balore de 12 e 4 miliones. Su Casteddu, chi at cumpresu su balore de sos duos giogadores ma fintzas  sos problemas de su bilanciu suo, at a chircare fintzas a s’urtimu de alcansare cundissiones de vantaggiu.

Po su momentu, si bient movimentos puru intre prestidos e giogadores chi torrant in Sardigna. Scuffet at a torrare a su Napoli e Radunovic a su Bari, ma ambos non sunt in sos disignos tennicos: su primu diat podere andare a su Modena, inube depet andare fintzas Di Pardo, chi est accanta a su riscattu dae parte de sos grogu blau. Dae s’attera parte, si isettat sa ghirada de Idrissi, chi diat podere agattare logu supra sa fasca manca pustis de s’adiosu de Augello. No est peroe s’unicu nomene po cussu rolu: piaghet puru Cacace de s’Empoli.

Novidades sunt po arribare fintzas in sa dirigentzia: Guido Angelozzi, appena saludadu su Frosinone, est prontu a divennere su direttore isportivu novu de su Casteddu.A su logu suo at a bessire Nereo Bonato. Cun issu diat podere arribare fintzas duos zovanos interessantes: su foranu de attaccu Kvernadze e s’attaccante Ambrosino, cust’urtimu de propriedade de su Napoli e chi at sinzadu in s’urtima partida de s’Under 21.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Passizeris italianos inciassados in Dubai: si chircant bolos po los faghere torrare.

Sunt 563 sos italianos chi si acciappant ancora supra de sa Msc Crociere frimma in su portu de Dubai. Intre issos bi est una truma pitticca de deghe pessonas chi arribant dae Casteddu. Sa cumpanzia est chircande de ordiminzare sa torrada in Italia su prima possibbile, tribagliande po agattare bolos disponibbiles chi pottant faghere torrare a domo tottus sos passizeris.

Po custu motivu sunt bistadas cuntattadas medas cumpanzias aereas internatzionales. S’intentu est de agattare postos supra bolos de linea po permittere a sos passezeris de dassare Dubai e torrare in sos paisos insoro. Intamen sa situassione no est simple e dimandat tempus, pro itte sos collegamentos aereos in cussa zura sunt torrande a incuminzare e sos postos non sunt meda.

Secundu cantu comunicadu dae sa cumpanzia, supra sa nave sa situassione est tranchilla.Sos passezeris istant bene e sighint a rezzire novidades supra su chi est sutzedinde e s’iscumbattu  de ordiminzare sa torrada. In su mentres podent impittare tottu sos servitzios chi bi sunt in sa nave. S’assistentzia a sos passezeris sighit a essere garantida. Sas difficultades printzipales sunt propriu so s’ordimizzasione de sos bolos.

Carchi cumpanzia aerea at pigadu sos collegamentos in sa zura, ma est favoressende sos passezeris chi aiant giai prenotadu sos bolos prima de sos atteros. Custu cheret narrere chi chie teniat prenotassiones fattas dae pagu deppet isettare prus tempus po agattare unu postu disponibbile. Pro custu motivu sa torrada de tottus sos crocieristas dimandat prus dies de su chi si prenettaiat.

Po chircare de essere prus fusidos, sa cumpanzia est baludande fintzas attera solutziones possibbiles. Intre custas bi est s’idea de ordiminzare bolos ispeciales dedicados a sos passezeris de sa nave. Custos bolos diant podere partire non solu dae Dubai, ma fintzas dae atteros aereoportos accanta. In su mentres si sighit a tribagliare imparis cun sas autoridades. S’intentu est de garantire una torrada limpia e sigura po tottu sos passezeris.

In sas dies imbenientes si at a cumprendere menzus cando ant a podere partire sos primos bolos e cando sos biazzadores ant a resessire a torrare a domo.

 Attività realizzata col contributo della Regione Sardegna — IMPRENTAS 2025-2026. LR 22/2018, art. 22