Est accabbada in sa Costa Smeralda su trettu de Portu Cherbu de The Nations League-Swan One Designed Worlds, abbenimentu chi at assortidu su menzus de sa vela internatzionale. Ordiminzada dae su Yacth Club Costa Smeralda in coperassione cun ClubSwan Racing, sa manifestassione at mustradu ispettaculu, tennica e passione in mare, tzelebrande s’essentzia pius innida de sa vela isportiva.

Interpretes assoludos de sa chida sunt bistados sos “monotipo” de sa frotta ClubSwan, barcas disignadas po afferrere rendimentu artu ma cun d’una anima meda “one design”, uguale po tottu sos meres de sas barcas. Custu fattu garantit chi a faghere sa differentzia diant essere sas capatzidades de sos echipaggios,s’astutzia e sa dilighesa in sa conduida. Portu Cherbu, cun sas bistas suas chi che bogant s’alenu,sas avrinas chi no si podent prevedere e sas cuberria chi no tenet diffettos, est bistadu po un’attera borta teatru perfettu po proas dae su livellu tennicu artu meda.

A binchere su titulu mundiale de sa categoria pius de grandesa, sos ClubSwan 50, est bistadu Earlybird, chi at dominadu su campionadu cun d’una proa de accontu. Unu sutzessu fraigadu in sos annos, cun dedissione e tribagliu de isquadra, finidu in d’una chida in sa cale tottu at funtzionadu in manera perfetta. Po su team tedescu, giai tres bortas vicecampione, si tratta de sa cunsagrassione deffinitiva in d’una de sas classes pius cumpetittivas de sa vela de artura moderna.

Sa classe at bidu sa cunfirma de su team brasilianu Mamao, chi atconchistadu su titulu po sa tertza borta una fattu de s’attera. Unu risurtadu chi evidentziat no solu sa continuidade tennica, ma fintzas sa capatzidade de si adattare a sas cundissiones chi in su campu de gara sardu cambiant a sa lestra in tottu sa chida.

Sas cundissiones de su tempus sunt bistadas sas menzus po podere garantire garas ispettaculares: unu bentu lebiu dae nord, de casi 11 crobos, at permittidu de accabbare tottu su programma.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22