Imbestu a unu furgone chi battiat dinari in s’Aurelia: iscupulada sa ghenga, undighi arrestos.

Sunt undighi sas pessonas arrestadas, tottas de su nugoresu e de edade cumpresa intre sos 33 e sos 54 annos, chi si pensat siant responsabbiles de s’imbestu armadu fattu su 28 de martzu passadu contra duos medios de sa Battistolli in s’Aurelia, accanta a San Vincenzo, in provintzia de Livorno. Unu corpu de tres miliones de euros, dinari destinadu a sas pesones, fattu intre die cun d’una assione paramilitare chi at abbolottadu sa zura: corpos de mitra, iscoppios, medios brusiados e una fuidura ordiminzada in tottu sos particulares. Solu po fortuna non bi sunt bistados mortos.

Noe arrestos sunt bistados fattos in Nugoro, unu accanta a Pisa- inube diat essere bistada posta sa base logistica de sa ghenga, e unu in Bologna. Sue de doighi de sos scruccullados, chi po su momentu est liberu,est bistadu compudadu.

Sos arrestados sunt pesadores e massajos, calicunu de issos giai connoschidu dae sos carabinneris po crimenes comente accrassadura e possessu de armas chentza autorissasione. Passados pius pagu de duos meses dae s’imbestu, sas scruccullas ant giuttu a connoschere s’identidade e arrestu de sa ghenga chi si pensat eppat fattu s’imbestu.

Elementu chi est sa crae de s’iscruccullu est bistadu s’accattu de unu billetteddu cun duos numeros de telefono, iscopertu in d’unu pazarzu isoladu in s’internu de sa Toscana, a 30 kilometros dae San Vincenzo. In su mentres de sos controllos fattoso a pustis de su corpu, sos carabinneris aiant iscopertu in cussu logu duos omines chi drommiant in mesu de sa paza: issos tian essere membros de sa ghenga armada. Cussos numeros ant permittidu de connoschere una retza fitta de cuntattos e comunicassiones, fattas cun telefoneddos betzos chentza connessione de datos e diffitziles de urminare.

Otto pessonas tiant aere partetzipadu de siguru a s’imbestu, mentres atteras tres si tiant essere occupadas de controllare sos movimentos de sos furgones chi battiant s’inari. Su bottinu, de casi tres miliones de euros, non est bistadu ancora acciappidu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Masainas,disgarriga abbusiva e tribagliadores chena cuntrattu in d’una ditta de massajos: denuntziadu un’impresariu.

Una disgarriga abbusiva, tribagliadores chena cuntrattu e fura de currente. Est cantu ant iscopertu sos carabbineris in su mentres de compudos in d’una ditta de massajos de Masainas. S’operassione st bistada fatta cun s’accottu de paritzas setziones e s’azzudu de unu elicotteru de Elmas, chi at boladu supra sa zura in su
mentres de sos controllos. Controllos chi sunt bistados ordiminzados po abberguare su rispettu de sas lezez ambientales, de su tribagliu e de sa siguresa in sas dittas de s’iscrocca.

Sos controllos si sunt cuncentrados supra sos terrinos de una sotziedade de massajos de un’omine de 53 annos. In su mentres de sos controllos, sos carabbineris ant incumintzadu a controllare istrutturas, impiantos e attividades presentes in sa zura. In su mentres de sos atzertamentos est bessidu a pizu chi s’omine impittaiat sa retza elettrica chentz cuntrattu. Sa ditta fuit collegata a sa currente chena autorizzassione, impittandela chena la pagare. Pro custu motivu est partida fintzas s’accusa de furtu aggravadu de currente.

Sighinde cun sos controllos, sos carabbineris ant acciappidu fintzas unu motocoltivadore furadu, chi fuit de propriedade de un’atteru imprendidore de sa zura chi nde aiat denuntziadu su furtu. Est iscattada fintzas sa denuntzia po ricettassione. Sa zura de sa laurantza si presentaiat in cundissiones malas. Secundu canto ant cunfirmadu sos militares, una parte de sos terrinos fuit bistada revertida in d’una disgarriga manna chena autorisassione. Intro de sa zura sunt bistados acciappidos arreffudos ispetziales e cosas perigulosas po s’ambiente.

A s’omine sunt bistadas cuntestadas paritzas macchiscias: controllu illetzidu de arrefudos, disgarriga abbusiva, de aere brusiadu illetzitamente arrefudos, iscarrigos de fauda chena autorissassione e de aere fattu autodemolizione chena nde tennere s’autorissassione. In su mentres de sos controllos est bessidu a pizu fintzas un’atteru probblema, ligadu a sa defensa de sos tribagliadores. Intro de sos amparos de sa ditta sunt bistados acciappidos duos tribagliadores chena cuntrattu.

A s’accabbu de s’operassione tottu sa zura est bistada secuestrada po prevensione, imparis a sos materiales e mezzos acciappidos in su mentre de sos controllos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22