Terranoa puntat in artu: partit su cursu novu de laurea in Aeronautica.

Terranoa affortigat su rolu suo de polu universitariu e de fundamentu po sa formatzione tennica-iscentifica in Sardigna. Pustis de s’attivassione de su cursu de laurea in Inzennieria navale, sa tzittade si approntat a accollire unu caminu accademicu dedicadu a su campu aeronauticu, gratzias a s’assistentzia de s’Universidade de Casteddu. Su nuntziu uffitziale est arrivadu su 2 de Maju, in su mentres de sa mustra nautica de Sardigna in Porto Rotondo.

Su direttore de s’Universidade de Casteddu, Frantziscu Mola, at cunfirmadu sa disponibilidade de s’Universidade po faghere incumintzare su cursu, evidentziande comente s’initziativa rispondat a una bisione de isviluppu de s’iscrocca poderadu dae sa formatzione de calidade e dae sa modernidade. Su disignu at tentu s’accottu cumbintu de sas istitussiones locales e regionales, cun su sindigu de Terranoa, Settimo Nizzi, e su Vice presidente de sa Regione Zuseppe Meloni, chi ant espressadu adesione prena.

S’introduissione de su cursu de laurea in Aeronautica est un’atteru passu a daenanti po fraigare un’offerta formativa chi punnat a campos istrategicos de sa carradura, de sa mobilidade e de s’inzennieria avanzada. In d’unu cuntestu comente cussu gadduresu, chi tenet una bocassione turistica, de disposissione e portuale, sa presentzia de unu cursu basadu supra s’aeronautica at a podere creare cooperassiones novas intre universidade, dittas e mundu de su tribagliu.

Terranoa affortigat gai su proffilu suo de tzittade universidaria de su nord Sardigna, chi podet attirare istudiantes zovanos e imbestimentos in formatzione. Su cursu no at essere solu un’occasione accademica, ma puru un’ispinta po s’isviluppu de s’iscrocca, gratzias a sa possibilidade de frommare friguras proffessionales ispecializzadas meda, sas cales sunt chircadas in d’unu campu chi est semper in mezoramentu comente cussu aerospatziale.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Premiadas in Casteddu sas menzus star-up de sa Sardigna: eredidades digitales,imballazzos de licoritzia e frores a tennologia arta.

A sa Manifattura Tabacchi de Casteddu sunt bistadas premiadas sas menzus start-up de sa Sardigna in su mentres de s’edissione 2025 de su SIOS Startupitalia Open Summit, s’abbenimentu chi donz’annu assortat impresarios,imbestidores, innoadores e appassionados de tennologia. Su filu chi conduit de cust’annu, “HUMANS – Su Tempus benidore est Umanu” at ghiadu unu cunsideru tottu paris supra s’appitzicu intre mezoru tennologicu e tzentralidade de sa pessona.

Supra su cataffale est pigada Zephorum, sa prima peagna dedicada a sa organissasione, controllu e cummemorassione de s’eredidade digitale. Su disignu permittit de ordiminzare itte at a sutzedere a sos temas insoro online pustis de sa morte: dae sa possibilidade de disparrere de su tottu dae su web, fintzas a s’isseberu de dassare un’ammentu digitale chi duret in su tempus, fintzas po ingendras.

Intre sas finalistas puru Bloomlabs, una solussione noa po su campu de sos frores fundada supra s’intelligentzia artifiziale e machine learning. Sa Start-up accomettat problemas comente s’istagionalidade, s’organissassione cumplessa e s’accreschimentu de sos pretzios, gratzias a algoritmos chi regulant in manera automatica sas cundissiones de su clima in sos tenimentos a s’inserru, permittinde una semenadura de frores po tottu s’annu.

At alcansadu attentzione meda fintzas Alkelux, chi isfroscat bio-additivos anti microbici po imballazzos de sa cosa de pappare partinde dae sos arrefudos dae sas mattas de sa licoritzia. Sa tennologia permittit de allongare sa costoidura de sa cosa de pappare comente frutta e pane, dande unu contribbudu po minimare meda sos isperdissios.

S’edissione 2025 de su SIOS at creffidu evidentziare comente s’intelligentzia artifitziale, s’internet of Things, sa realidade accreschida e atteras tennologias chi sunt naschinde potant mustrare no solu istrumentos de cambiamentu, ma fintzas levas po s’incluisione sotziale e su mezoramentu de sa calidade de sa vida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22