Dae figuras istoricas a interpretes de s’arte de oe, passande po sa musica, sa moda e sa chirca iscientifica, custas pessonas importantes giughent artu su nomene de sa Sardigna in sa bista internatzionale. Accò chimbe sardos tzelebres in su mundu, conas de sa zenialitade e de sa fortza identidaria de s’isula.

Grassia Deledda

Naschida in Nugoro in su 1871, Grassia Deledda est chena duda sa figura litteraria pius tzelebre de s’isula. Autodidatta, at contadu comente niunu atteru s’anima funguda e sas gherras intre su populu suo. In su 1926 at binchidu su premiu Nobel po sa Litteradura, prima e sola iscrittora italiana a retzire un riconnoschimentu comente custu.

Antonio Gramsci

Naschidu in Ales in su 1891, Antonio Gramsci est unu de sos pius importantes pensadores de su Noighentos. Fundadore de su Partidu Comunista de Italia, est bistadu impresonadu dae su guvernu fascista e in su mentres de sa presonia at iscrittu sos tzelebres “Cuadernos de sa presone”, operas de fundamentu chi che ant leadu Gramsci a essere istudiadu in tottu sas Universidades de su mundu: su pensamentu suo de soberania culturale est a dies de oe unu fentomu netzessariu in sas iscientzas sotziales.

Giovanni Maria Angioy

Naschidu in bono in su 1751, Angioy est bistadu zuighe, politicu e pensadore allugante chi, ispiradu dae sos movimentos revolussionarios de
s’Europa, at ghiadu a sa fine de su Settichentos s’iscumbattu pius importante po affrancare sa Sardigna dae su poderiu feudale e de sos
Sabaudos.

Maria Carta

Naschida in Siligo in su 1934, Maria Carta est bistada una de sas interpretes pius poderosas e berteras de sa musica sarda, capatze de che leare sos cantos de su connottu, sos gosos e sas launeddas supra de sos cataffales internatzionales pius mannos. Cua sa boghe sua funguda, drammatiga e cadria, at fattu attumbare s’anima de s’isula in teatros, festival e trasmissiones in Europa e in sos Istados Unidos.

Eleonora d’Arborea

Naschida in Aristanis in su 1347 est bistada zuighessa de Arborea, connoschida po s’azzorronamentu de sa carta de Logu, isparta dae su babbu Mariano IV e torrada a biere dae su frade pius mannu Ugone. Su signifficu chi benit dadu a sa figura e a su dominiu de Eleonora de Arborea,est evidentziadu dae su fattu chi su rennu de Arborea est bistadu s’urtimu Istadu sardu locale chi est bistadu dadu a rennantes chi arribaiant dae fora de s’isula. Custu faghet in manera chi siat a s’ispissu bista comente sa printzipale eroina natzionale de sa Sardigna, imparis cun Giovanni Maria Angioy.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22