Su Nenniri in Sardigna: sos abbrosso de su connottu, Ispera e Torrada.

In su coro de su connottu populare sardu, intre ritos antigos e ispiritualidade funguda, su nenniri si annoditat comente una de sas conas piu poeticas e de signifficu ligadas a su tempus de sa cuaresima e de sa pasca. Mancari sa simplesa de bisera sua- pagos semenes chi abbrossant in d’unu prattu pitticcu- su nenniri arregat intre isse mizza e mizza annos de istoria, credentzias paganas, influentzas cristianas e unu ligonzu forte cun sa terra e su tempus periodicu de sa nadura.

Sa paraula nenniri faghet relata a mattas pitticcas moddes e zovanas. Si trattat, in pratiga, de semenes de ranu, orzu e lentiza chi benint
semenados in isterzos pitticcos prenados de bombaghe,cotone o terra. Sa semena abbennit po su connottu in sae tres dominigas de Cuaresima, connoschida in carchi zura de sa Sardigna comente sa Dominiga de su Nenniri, fintzas si sa data podet variare dae una bidda a s’attera.

Intre sas chidas, sos semenes abbrossant e creschent cun fortalesa manna, dande vida a chirras de unu birde lughente chi ant essere pustis impittadas in sa Chida Santa po decorare sos “Sepurcos” de sas cresias, o menzus sos artares de s’Iscravamentu de su Zovia Santu. Mancari oe su nenniri siat assotziadu a sos ritos de sa Pasca de su connottu cristianu, sas issidas suas affundant sas raighinas in tempos meda pius antigos. Si trattat, in realidade, de un’usantzia ligada a sos ritos agrarios paganos, presentes non solu in Sardigna, ma in culturas medas de su Mediterraneu.

Abbrossare sos semenes prima de los semenare in sos arvos fit un’attu irgheladore e de groglia: una manera po “proare” sa saliosidade de su ranu e po cramare abbundantzia in sas incunzas de su tempus benidore. Custa perfetta torrada a bida de sa nadura si fundet in manera perfetta cun su nunzu de sa Pasca cristiana: su coladorzu dae sa morte a sa vida. Cun s’arrivu de su Cristianesimu, duncas, su nenniri est bistadu “battizzadu”, podimos narrere, e controlladu a sa lughe de sa fide nova.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22