Mortorzu de Frantzisca Deidda: su misteru de su telefoneddu alluttupustis de meses mentres su maridu fit giai in presone.

Su mortorzu de Frantzisca Deidda, abbennidu su 10 de maju de s’annu passadu in Santu Sperau, sighit a essere imboddigadu in su misteru. Mancari sas scruccullas eppant battitu a s’arrestu de su maridu Igor Sollai, crettidu responsabbile de sa morte de sa femina, sas novas ghettant umbras chi inchiettant supra su chi est sutzessu.

In manera particulare una cosa est bessinde a pizu in sas urtimas chidas: su telefoneddu de sa femina, mai acciappadu, si est azzesu de repente battoro meses pustis de su mortorzu, cando Sollai fit giai in presone. Pustis de su mortorzu ifferiadu de Frantzisca, abbennidu in domo sua, su
telefoneddu suo fit sparessidu. Po meses sos aberguadores ant chircadu de l’ acciappare, avantzande paritzas assuntas.

Una de sas pius
cunsideradas indittait chi su telefoneddu che esseret bistadu imboladu in mare po  iscartare donzi trassa possibbile. Intames, sas chircas
fattas in sas abbas non ant mai battidu perunu risurtadu. Pustis, in su mese de cabidanni, unu corpu de iscena: su telefoneddu de Frantzisca si est torradu a azzendere po casi sette oras e mesu, collegandesi a unu repettidore accanta a Assemini.

Custu particulare, chi paret no tenzat signifficu, at pesadu atteras dimandas. Su fattu chi su telefoneddu eppat trasmittidu unu signale in d’unu logu
pretzisu diat podere mustrare unu indissiu de fundamentu po cumprendere itte pottat essere sutzessu pustis de su mortorzu. Si su telefoneddu non
est mai bistadu acciappidu, cheret narrere chi calicunu at dezisu de si lu tennere paris cun issu invetze de lu destruere. Custu cumportamentu diat podere indittare chi in mesu bi siat un’attera pessone, unu cumpanzu possibile o calicunu chi connoschet cosas particulares chi ancora si innorant.

Sas scruccullas sunt chircande de assebertare chie, in cussas dies, si acciapperat in sa zura de Assemini e poteret tennere su telefoneddu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”