Sa comunidade Bilartzesa est corpida po sa disparrida de repente de Gabriele Pinna, promissa zovana de su judo, istruncada dae una melenzite arburante suspetta.Su piccioccu,18 annos, si fit cualifficadu a sos campionados italianos sutta 21 annos. Sa carriera isportiva sua, peroe, est bistada interrumpida de repente dae unu male chi non li at dassadu iscampu.

Gabriele ch’ est bistadu leadu in presse meda a su Prontu Succursu de s’Ispidale Santu Martinu de Aristanis in su notte intre chenapura e
sapadu.Est arrivadu giai in cundizione critigas, e sos duttores l’ant cuberradu in sa sala inue ponent sos chi sunt privos de connoschentzia in su tentativu de lu firmare, ma sas cundissiones suas sunt peoradas in presse meda e , in pagas oras, su zovanu est mortu.

Sa morte sua at dassadu chena peraulas sos de sa familia, amigos e connoschentes, chi fintzas a pagos dies prima lu aiant bidu in salude, preparandesi a sos impignos isportivos de su tempus benidore.

Sas primas intzimias presentadas dae su zovanu dassan pagas dudas supra sa maladia: meningococco. Bida sa natura de sa maladia chi est impestosa meda, sas autoridades sanidarias de sa ASL de Aristanis ant attivadu in presse meda sas mesuras de sicuresa.

Su Servitziu de Sanidade Pubbrica at fattu partire un’sicruccullu po connoschere tottu sas pessonas chi sunt bintradas in cuntattu cun Gabriele Pinna in sas urtimas deghe dies. Sos remedios sunt bistados dados a sos de famiglia, sos cumpanzos de iscola e de isquadra, addia sos mastros, amigos e atteras pessonas chi diant podere aere cundivisu cun issu, logos serrados e cun meda zente. Sos duttores impreigant de non si allarmare meda. Bell’e gai, po cautela, chie si siat eppat tentu cuntattos cun su zovanu est imbidadu a leare antibioticos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22