Ozzastra abbolottada dae sa disaura: zovanu bocchidu a burteddadas in su mentres de sa Festa de su Carrasegare.

Una disaura at abbolottadu sa comunidade pitticca de Barì, in Ozzastra, su notte de sapadu, cando una festa de Carrasegare si est revertida in d’unu teatru de violentzia e sambene. Marco Mameli, unu operaju zovanu de 22 annos chi arrivaiat dae Ilbono(Nugoro), at perdidu sa vida pustis de essere bistadu abburteddadu a sas pettorras a su coliminzu de una briga chi est incumintzada po motivos chi sunt ancora de accrarare.

Sa serana fit incumintzada in manera discansosa, intre carros de carrasegare, caratzas e musica, comente est su connottu in su tzentru pitticcu de sa Sardigna orientale. Marco Mameli si acciappaiat in cumpanzia de amigos, prontu a si godire su tempus de festa chi donzi annu animat Barì po Carrasegare.Intames, sa gioia at dassadu in presse logu a sa timoria e su disisperu cando, in carrela Santa Cecilia, in su coro de su tzentru istoricu, est incumintzada una briga fogosa intre unu fiottu de piccioccos.

In pagos momentos, sa situassione est disgeniada: paraulas atzessas, ispintas, boghes e pustis sa fine dolosa meda. Calicunu at bogadu a fora unu burteddu e at dadu su corpu moratle a sas pettorras de Mameli. Su zovanu est ruttu in terra, mentres a inghiriu si iscadenaiat su terrore.

Un’atteru piccioccu est adduradu fertu in sa briga e ch’est bistadu leadu de cursa a su Prontu Succursu, ma sas cundissiones suas non sunt graves.

Cando sunt arrivados sos de su 118, po Marco Mameli non bi fit pius nudda de itte faghere: su corpu a sas pettorras est bistadu mortale e at istruncadu sa zovane vida sua in pagos minutos. In cussu logu sunt arrivados in presse meda sos omines de sa Politzia de Tortolie, ghiados dae su vice questore Fabrizio Figliola. Sos de sa Politzia ant fattu partire sas iscruccullas e regortu sas primas testimonias po chircare de cumprendere chie esseret su chi at bocchidu Mameli.

Intre su notte, su zuighe chi fuit in servitziu e su duttore legale ant fattu sos primos rilievos in su logu de su crimene. Sa politzia est esaminande sas immagines de sas telecameras chi bi sunt in cussu logu e sunt sighinde a catzare su responsabbile, chi tiat podere aere gia dassadu sa tzittadina, po iscansare s’arrestu.

Sa nova de su mortoriu si est ispartida in presse meda, ghettande Barì e tottu sa comunidade de s’Ozzastra in s’isporu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Giallu de Portisco, atzertamentos novos supra sa barca: misteru supra sa morte de Giuanne Marchionni.

Sunt andados a daenanti po pius de battoro oras sos cabbales iscientificos supra sa barca agganciada in sa Marina de Portisco, in Terranoa,intre sa cale, su manzanu de s’8 austu passadu, est bistadu acciappadu su corpus chentza vida de Giuanne Marchionni, 21 annos, naschidu in Bacoli, in provintzia de Napoli.

S’accertamentu chi non si podet ripitere dimandadu dae sa Procura de Tempio Pausania teniat comente intentu su controllu de fuidas de gas o sustantzias tosigas chi potant aere provocadu sa morte de su zovanu. Sos primos controllos,intamen, non ant evidentziadu problemas: nissuna perdida, nissuna paporada est bistada acattada intro de sa barca.

Sos controllos si sunt cuncentrados in manera particulare supra su sistema elettricu e sas batterias. Sunt bistadas controlladas ses batterias de servitziu postat a su tzentru de sa barca, e chi funt tottus perfettas, e pustis cussas de su motore. S’idea de un’attoscadura dae monossido di carbonio addurat diffitzile de agguantare: su gas, pius pesante de s’aera, che finid in sos puntos pius bassos, mentres su logu in su cale drommiat su zovanu est in artu e attesu dae sa zura de su motore.

Cun s’arrivu de s’iscuru, sas operassiones sunt bistadas frimmadas e ant a torrare a incumintzare merculis prossimu. In cussa occasione, sos tennicos ant a faghere atteros controllos cun sos motores de sa barca azzesos, cun s’isperantzia de accrarare si bi funt cosas chi no funtzionaiant o ispartinaduras chi non si sunt bidas in sos primos esamenes. Sa morte de Giuanne Marchionni addurat, duncas,imboligada in su misteru.In custu mamentu non si connoschent ancora motivos tzertos chi potant faghere cumprendere sa morte, e s’attentzione de sa politzia addurat cuncentrada supra donzi elementu tennicu chi potat servire a cumprendere itte potat essere sutzessu cussu tragicu manzanu de istiu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22