Ets incumintzadu oe, in su Tribunale de Casteddu, su protzessu derettu a Igor Sollai, accusadu de aere mortu sa muzere e nde aere cuadu su corpus. S’omine , chi como est in presone, at cunfessadu de aere mortu sa muzere, Frantzisca Deidda, 42 annos, isparida su 10 de maju de s’annu passadu dae Santu Sperau, unu columene pitticcu a casi 20 kilometros dae Casteddu.

Pustis de paritzas chidas de chirca, sos piccos de sa femina funt bistados acciappados su 18 de triulas, cuados intro de una buscia manna meda abbandonada in su sartu intre Sinnai e Santu Idu, accanta a sa carrela istatale betza 125.
S’accusadu est arrivadu in su tribunale pagu prima de sas 8:50, bestidu cun d’unu gorfo bleu cun tira lampu e bragas trinas.

In su mentres de s’intrada in su Tribunale at tentu una chinna fritta,iscansande sas miradas de sos chi bi funt incuddane e faeddande solu cun sos abbocados suos e sos zuighes de sa Corte de Assise. In s’aula bi fint fintzas su babbu e sa mama de s’imputadu, su frade de sa morta, e carchi cumpanza de sa femina, testimonzos crae in custu casu, pro itte fint bistados issos a denuntziare sa disparida sua, assumbradas po s’ausentzia sua dae su tribagliu e pro itte non rispondiat pius a su telefoneddu.

In sa prima audentzia, si est custituida sa parte tzivile dae parte de Andria Deidda, cun s’abbocadu Gianfranco Piscitelli, e sos tzios dae parte de sa mama de sa morta, Renato e Efisio Zoccheddu. Sa parte tirana Marco Cocco at dimandadu a sa corte de accherire tottu s’imbuddicamentu de s’iscrucculla, dimanda chi est bistada accasazzada fintzas dae sos abbocados de sa deffensa. Pustis de custas formalidades, su protzessu est bistadu azzorronadu a su 7 de maju, cando si at a bintrare in su dibbattimentu.

S’accusa puntat a chircare de cumprendere cun pretzisione meda sos momentos de su crimene po mustrare sa presentzia de aggravamentos, in mesu de sas cales bi est chi tottu est bistadu fattu a s’apposta, una cosa chi Sollai at semper nadu chi no est sutzessa. Secundu sa Procura, Igor Sollai diat aere progettadu de bocchire sa muzzere po motivos accolomicos e sentimentosos. Dae sas iscruccullas est bessidu a pizzu chi s’omine teniat un’appitzigu cun d’una attera femina e chi sa morte de sa muzzere lis diat aere permittidu de incassare un’assicuratzione supra sa vida, fatta paris cun Frantzisca, de 100.000 euros.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22