Est bistadu fissadu s’incarrigu po s’autopsia de Natalie Tanda, sa pizzinna de otto annos morta sapadu sero in s’Ispidale Tzivile de s’Alighera, in trischias chi ant ispertadu commossione e iscuntzertu mannos meda.

S’autopsia l’ant a faghere su 19 de frearzu in s’Ispidale de Meighina Legale de Tattari.

S’incarrigu de s’autopsia a unu duttore fora de s’Ispidale de Tattari est bistada netzessaria pro itte custa istruttura faghet parte de sa mattessi Asl de s’ispidale de s’Alighera, inue sa pizzinna fit cuberrada. Sa detzisione de sos zuighes punnat a garantire sa trasparentzia pius manna po cumprendere sos motivos de sa morte, chi at dassadu ispora tottu sa comunidade de Biddanoa Monteleone, bidda de origine de sa pizzinna.

In su mentres, sa procura at disponnidu su secuestru de sa cartella clinica de sa pizzinna, unu passu importante meda po cumprendere sas urtimas dies de sa vida sua e cumprendere si bi siant bistadas trascuradesas o cumplicassiones pustis de s’operassione e cosas chi non sunt bistadas fattas bene. Natalie, duas dies prima fit bistada operada po li che bogare sos tuleddos in sa parte de otorinolaringoiatria de s’ispidale de s’Alighera.

Sa famiglia de sa pizzinna, chi est ancora abbolottada po custa disgrassia, at dezisu de nomenare unu consulente meigu-legale suo, po partetzipare a s’autopsia. Sos abocados chi ant nomenadu su babbu e sa mama de sa pizzinna, ant nadu chi s’obiettivu est cussu de faghere lughe prena supra su chi est suzzessu e cumprendere ite potat essere suzzessu in sas oras pustis de s’operassione.

Tottu sa comunidade de Biddanoa Monteleone est in dolu po s’improvvisa disparida de Natalie, chi benit ammentada commente una pizzinna solare e prena de vida. Paritzos nuntzos de cordozu sunt arrivados a sa famiglia, mentres sos amigos e sos connoschentes s’istringhent a sa famiglia in custu momentu de dolu.

In sas dies imbenientes si isettant sos risurtados de s’autopsia, chi tiant podere offerrere rispostas detzisivas supra itte eppat causadu custa fine fea. Sa zustissia at a baludare si bi sunt curpas e, si est netzessariu, at a faghere atteros atzertamentos po garantire zustissia a sa pitticca Natalie.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”