Nugoresu: Sa crisi de s’abba est minimande gratzias a sas temporadas e a su livellu novu de sa diga Maccheronis.

In su Nugoresu, una de sas zuras pius corpadas dae sa crisi de s’abba in Sardigna, si bient signales positivos gratzias a s’arrivu de sas temporadas e a interventos importantes supra su controllu de sos cadinos.

Sas temporadas incumintzadas su sero de giovia e sighidas sas dies imbenientes ant dadu unu contribbudu de signifficu po accreschere su livellu de sos cadinos de sa Sardigna orientale, inube sa siccagna aiat creadu difficultades graves meda.

Intre sas printzipales novidades, s’artzadura de su livellu de su cadinu de sa diga Maccheronis, chi est in su Comune de Torpè, est una bortada importante po accomettare s’emergentzia de s’abba. Gratzias a unu pregone frimmadu dae su direttore generale de sa Protetzione Tzivile, s’affrontadura de su livellu de su cadinu est bistada po su momentu accreschida dae 40,5 metros a 42,3 metros supra su livellu de su mare.

Custa modifica at addurare fintzas a su 31 de Martzu 2025 e si insertat in su cuadru de su Pianu de artaria chi bi est como. Sa detzisione est bistada leada a sa fine de un’addobiu de sos membros de s’Agentzia Regionale delì su Distrettu Idrograficu de sa Sardigna (ADIS), s’assessoradu regionale de sos Tribaglios Pubbricos, S’ente de sas Abbas de sa Sardigna (ENAS), sa Protetzione Tzivile e sos sindigos de Pasada e Torpè. In su mentres de s’assortidortzu, tottus sos chi ant partetzipadu sunt bistados de accordu po cambiare su livellu de su cadinu, evidentziande sa netzessidade de garantire un’ecchilibriu intre sa sicuresa idraulica e sa tutoria de su bene de s’abba.

S’accreschimentu de su livellu at a permittere de che bogare po su momentu sos limites po s’abba e sas proibissiones de abbare sos campos chi fint bistadas postas in Baronia. Bell’e gai, sas autoridades locales e regionales ant cunfirmadu s’importantzia de controllare cun attentzione meda sa situatzione po evitare chi bi siant arriscos po sas zuras sutta sa diga.

Sos sindigos de Pasada e Torpè ant cunfirmadu tottu sas mesuras de protetzione tzivile prevedidas in sos pranos de sos comunes, comente s’informatzione de dare impresse a sa popolatzione, su controllu de sos pontes e de sos giumpadorios de sos cursos de s’abba e su controllu de sas zuras de sos flumenes po controllare chi siant francas dae pessonas e animales.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sartiglia 2026 : connottu, caddos e contierras supra sa siguresa.

Sa Sartiglia de Aristanis torrat a colorare sas carrelas de sa tzittade cun sa sua ispettaculare cursa medievale cun sos caddos, unu de sos abbenimentos  prus ammaghiantes de su Carrasegare sardu. Setzidores caratzados a caddu si disaffiant in sa cursa a s’istedda e in sas parizas, mustrande abilidade e corazzu e muttinde appassionados de folklore e turistas dae tottu s’isula e dae fora. S’ispettaculu, cun raighinas de seculos, mustrat s’identidade culturale aristanesa, ma s’edissione de cust’annu est accumpanzada dae dibattas e contierras ligadas a sa siguresa.

Sas dispostas novas prenettant affianzos comente cascos e gorpettes po sos setzidores, ma sos ordiminzadores narant chi custos obbrigos arriscant de cumpromittere sa parte de su connottu e bisiva de sa Sartiglia, intre costumenes istoricos e caratzas tipicas.

S’amministratzione comunale at avantzadu interpretatziones chi diant permittire de faghere s’abbenimentu chentza revertire sas leghias antigas, mentres sa chistione est bistada discutida fintzas a livellu istitutzionale pro accrarare sas regulas. Sa cosa addurat cristallitzada, cun cussos chi sustentant su connottu chi dimandant de mantennere frimma s’identidade de sa manifestassione e cussos chi sunt interessados a tutelare sos setzidores e sos animales.

Sos Gremios istoricos, assotzios chi mustrant sos Gremios ligados a sa Sartiglia, ant ghettadu appellos po diffendere sa manifestassione in sa forma sua originale. Mancari sas tesones, sos ammanizos andant a daenanti intre proas, bestiduras e costumenes, dae sa frigura de Eleonora de Arborea fintzas a sos isseperos de sas parizas. Sa tzittade bivit unu fermentu chi aunit braga e murighinzu, mentres sa comunidade chircat de abbilantzare rispettu po su conntottu e attentzione a sas regulas novas de siguresa.

Sa Sartiglia addurat gai una frigura de istoria, comunidade e floklore, e sas contierras de cust’annu reflettint s’isfida chidrina de cunciliare su rispettu de su connottu antigu cun sas esigentzias de sa siguresa moderna. Abbenimentos comente sa Sartiglia non sunt solu ispettaculos, ma beros e proprios istrumentos de memoria de tottus e identidade culturale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22