Una diga po su tempus benidore: torrant a partire sos tribaglios supra su riu Monti Nieddu, s’opera pronta intre su 2028.

Pustis de annos de isettu e cuntestassiones, torrant a partire sos tribaglios po fraigare sa diga supra de su riu Monti Nieddu in Sarroch, una de sas operas pius isettadas de sa Sardigna. Custa diga, progettada po rispondere a sas porfias ligadas a su compudu de su bene de s’abba, est un’interventu detzisivu po s’iscrocca e at essere finida intro de su mese de Nadale 2028.

S’integru uffutziale de su cantieri faghet partire unu calendariu padriu chi prenettat fases operativas divressas. In sos primos ses meses at essere accabbadu su progettu operativu, a su cale ant a sighire battoro meses destinados a abbalorare e alcansare sas autorisassiones chi serbint. Su fraigu beru at incumintzare in su mese de sant’Andria 2025.

Cun d’unu imbestimentu totale de pius de 171 miliones de euros, sa diga est progettada po cabire 35,4 miliones de metros cubos de abba. De custa capatzidade, 9,6 miliones ant essere dedicados a s’abba chi serbit po buffare, mentres 25,8 miliones ant a serbire po s’abbadura de sa laurantza.

Addia de assulenare custas esigentzias essentziales, sa diga at a tennere una funtzione importante meda po cabire sas prenas. Custa bisura at essere importante po minimare s’arriscu de strossas e diffendere sas biddas de Villa San Pietro e Pula, chi si acciappant in sa badde sutta de su sistema de su riu.

S’assione tenet tres elementos printzipales: sa diga supra su riu Monti Nieddu, sa travessa de Medau Aingiu supra su riu Is Canargius e una galleria de collegamentu chi at a permittere su collegamentu de sos cadinos de Monti Nieddu e Is Canargius. Custu cumplessu impiantu puntat no solu a garantire unu allocu de abba bastante po sas netzessidades de donzi die a sa popolatzione a a sas attividades de laurantza, ma puru po accreschere sa sicuresa de tottu s’iscrocca, in d’unu cuntestu regionale chi est esponnidu semper de pius a sos arriscos ligados a sos cambiamentos de su tempus.

Su controllu de su progettu est intregadu a su “Consorzio de Bonifica de sa Sardigna meridionale”, chi faghet comente istazione appaltante. Custu progettu mustrat unu cambiu de passu de signifficu po s’amministrassione regionale, chi puntat a resorvere sas emergentzias de s’abba cun interventos chi durent tempus meda.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22