Pustis de un’annu de tribagliu cadriu, si est concruidu su docu-video dedicadu a sas abbas chi passant in s’iscrocca de s’allocu de sa Biosfera MaB UNESCO Tepilora, Riu Pasada e Montalbo. Custu progettu est unu donu a sa natura, unu contu chi si innoigrat intre sas battoro istagiones po iscumbattare su ligamine chi non si podet isorbere intre s’abba e sa bista, intre sas pessones e su logu insoro.

Su percursu de su docufilm s’isfroscat in mesu de campedas, montes, baddes e campuras, fintzas a segudare sas abbas gristallinas de sa costa de Pasada. Ma su contu no allegat solu de sa supraffitzie: bintrat in sa fundaria de su Montalbo, in mesu de gruttas e ischintorzos carchinarzos istoffados in su tempus dae s’abba, unu mundu cuadu inube sa natura si mustrat in frommas unicas chi ammaghiant.

Secundu sos chi ant fattu su progettu, su docufilm partit dae sos logos inube naschent sos flumines e sos rios, sighinde su caminu insoro in su mentres chi accollint abba chi accudit po s’istajone, po more de sas temporadas de s’jerru e su beranu. S’abba, gai diventat su filu chi ghiat unu contu chi intritzat sos temas de s’ambiente, su turismu, s’isport, sa laurantza e ligados a sa pisca, offerrinde una bisione cumprida de sa vida chi frorit a inghiriu de custu bene vivu.

Sas friguras acciappant no solu sa bista ma fintzas sa vida chi la populat. Animales arestes e de pesadura, impare a paritzas zenias de puzzones cussorzales o chi arribant po sas istagiones, animant custu ecosistema riccu de “biodiversità”.

In sa fundaria de sas gruttas, imbetzes, su pius connottu est su Geotritone de su Montalbo, un’animale abbarbadu chi testimonzat s’importantzia biologica de custos logos.

Su docufilm si proponnet fintzas comente unu consideru supra sas porfias de oe, ligadas a sa muda de su clima. In su mentres de su manizu, dae sa fine de su 2023 a s’attonzu de su 2024, sa mancantzia de temporadas e de su nie ant creadu una situassione de siccagna chi at influentzadu meda su progettu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22