Su casu de sa morte de una femina chi at abbolottadu Casteddu e tottu sa Sardigna intrea s’annu passadu, s’incarrelat a una fase nova de su zudissiu.

Igor Sollai, 43 annos, chi po como est intro de sa presone de Uta, si est preparande po accomettare luego su zudissiu po aere mortu sa muzzere, Francesca Deidda, de 42 annos. S’omine at cunfessadu su delittu, chi est bistadu fattu in sa domo insoro in Santu Sperau in su mese de Maju 2024, ammittinde puru de aere cuadu su corpus.

Cun su depositu de sos urtimos risurtados fattos dae sa Procura de Casteddu, in mesu de sos cales bi est sa resessia de sa lotomia, sunt finidas sas crompiduras de ammaniada. S’esamene de su corpus at cunfirmadu sa violentzia isferitzada de su delittu: Francesca est bistada fartada a su nessi otto bortas cun d’unu marteddu, chircande a sa disisperada de si diffendere, ma chentza bi resessire a si che fuire dae sa furia de su maridu.

Su corpus de de sa femina est bistadu acciappidu solu pustis de duos meses, su 18 de triulas, serradu intro de una bussa manna disamparadu in sas campagnas in mesu de Sinnai e Santu Idu, accanta a s’istatale bezza 125. Un’accattu chi at battidu atteru dolore a custa disgratzia, abbolottande sos de famiglia e sos amigos giai afferiados dae s’isettu longu.

Sollai at cunfessadu de aere mortu sa muzzere in su mentres chi lu fit preguntande in sa presone de Uta su pubbricu ministeriu Marco Cocco, su 22 de su mese de sant’Andria passadu.

Intamene, addurat azzesa sa dibatta supra su motivu de su delittu. Sa deffensa escluidit chi siat bistadu fattu a belle posta, nande chi tottu est sutzessu in d’unu momentu de arrenegu. S’accusa, invetzes, narat chi su mortoriu siat bistadu fattu pro itte su maridu cheriat balanzare dinari ca sa muzzere teniat un’assigurazione supra sa vida sua. Cun s’isserru de sas scruccullas chi si faghent a s’incumintzu, s’isettat in pagu tempus sa torradura de su corpus a sos familiares, chi ant in pagu tempus podere faghere s’interru de Francesca.

Sa comunidade de Santu Sperau, chi est galu attrippada, si est preparande a onorare sa memoria de sa femina. S’indolimentu po sa perdida si ammisturat a s’arrenegu po sa violentzia patida, atzendinde un’attera borta sa dibatta supra su bisonzu de diffendere sas feminas dae istinnas e violentzias intro de sas domos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sos  tres mastros mannos de su tzinema sardu:identidade e memoria supra s’ischermu mannu.

Intre sos registas sardos prus famados e de signifficu bi sunt Gianfranco Cabiddu, Sarbadore Mereu  e Enrico Pau, tres personalidades differentes po formassione e istile ma postas impare dae su disizu de contare s’isula in sa cumplessidade sua, binchinde friguras de su folklore. Su tzinema insoro at dadu unu contribbudu detzisivu pro fraigare unu contu modernu de sa Sardigna, capatze de faeddare cun sa bista natzionale e internatzionale.

Gianfranco Cabiddu est cussideradu unu de sos ispegilizatores de su tzinema sardu de oe. Sa carriera sua si distinghet po s’attentzione a sa mannesa culturale e litteraria, addia chi po unu ligonzu forte cun sa musica e su teatru. Operas comente Disamistade ant accomettadu temas chi pertoccant a s’istoria de s’isula in manera funguda, comente sa vinditta e sos codices de onore, apparande una mirada critiga ma mai subrana. Cun

La stoffa dei sogni, ambientadu in s’Asinara e ispiradu a Shakespeare, Cabiddu at mustradu sa capatzidade de fundere connottu e universalidade,alcansande reconnoschimentos importantes e candidandesi a premios natzionales. Su caminu artisticu suo est ligadu fintzas a sa frigura de De Andrè. Sarbadore Mereu est invetze una boghe prus deretta e de su tempus nostru. Su tzinema suo est a s’ispissu deffinidu reale e intimu, capatze de contare sa Sardigna dae sas foranias de sas tzittades, de sos zovanos e de sas trasformassiones sotziales.

Cun Ballo a tre passi at tentu unu sutzessu de critica mannu abberu, mentres Bellas Mariposas at conchistadu su pubbricu e sa critiga gratzias a unu limbazu novu e una contassia chi chi ponet impare unu eja e unu no dillezu e dramma. Mereu impittat a s’ispissu su sardu e attores chi non lu faghent po tribagliu, seperu chi dat berteresa e fortza de signifficu a sos films suos.

Enrico Pau si annodittat po un’istile prus poeticu e pensamentosu, deffinidu dae un’attentzione particulare a sa memoria, a sa mannesa de sas feminas e a s’istoria de s’isula. Cun l’Accabbadora at giuttu supra s’ischermu una frigura simbulu de su connottu sardu, accomettande temas diligos cun sensibilidade manna. Su tzinema suo si movet intre realidade e bellesa, apparande bistas cadrias e contos fungudos chi iscumbattant s’identidade de donzunu e de tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22