Un’intesa importante meda est bistada firmada intre sa Regione Sardigna e tres istitutziones iscientificas a livellu natzionale: S’istitutut Natzionale de Fisica Nucleare,  s’Istitutu Natzionale de Astrofisica(INAF) e s’istitutu Natzionale de Geofisica (INGV).

S’intentu printzipale de s’accordu est de accomettare sa candidadura de su logu accanta a sa miniera abbandonada de Luvula comente situ po accasazzare s’Eintein Telescope, unu progettu de punta po sa cherta internatzionale supra sa fisica de sas undas gravitatzionales.

S’accordu puntat a creare unu coordinamentu chi abbarret semper e chi ponzat impare sos entes chi partetzipant. Custas assiones si ant a cuncentrare supra capos divressos: dae s’indilighimentu e informatzione supra sa candidadura, a su mezzoru de s’iscrocca, fintzas a sa balorizzazione de s’identidade culturale e de su patrimoniu archeologicu de s’iscrocca.

S’afficcu iscientificu e didatticu giogat unu rolu tzentrale, cun iniziativas dedicadas a sa formassione iscientifica e tennica, addia a sa balorizzatzione de attividades de cherta in campos inportantes meda comente geologia,architettura,inzennieria e istudios supra s’effettu ambientale e sotziu-accolomicu.

In mesu de sos elementos de fundamentu, s’accordu prevedit su mezzoru de sos servitzios de trazu, comente aereos e carrelas, e s’istudiu de solutziones de mobilidade chi si potat sustentare chi serbat a sas esigentzias de s’Einstein Telescope. In pius si prevedint interventos po favoressere s’accollimentu de chertadores chi arribant dae fora, su fraigu de iscolas internatzionales e atteras initziativas po favoressere s’isviluppu de s’iscrocca.

Su cordinamentu de sas attividades at essere garantidu dae unu cunsizzu de controllu de ses pessonas, unu po donzi ente chi nde faghet parte, cun sa Presidentzia chi at essere dada a sa Regione Sardigna. Custu organismu at a tennere su compidu de controllare sos avantzamentos de sas initziativas e garantire una collaborassione balida de sos entes.

Sa candidadura de sa miniera de Luvula est un’opportunidade istravanada po sa Sardigna e po sa comunidade iscientifica internatzionale. Si at essere isseperada, sa zura tiat podere divennere unu tzentru de eccellentzia de tottu su mundu po sa cherta iscientifica.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Benito Urgu, unu de sos comigos prus connoschidos e appretziados de sa Sardigna.

Attore, cabarettista e tzelebridade televisiva, in sos annos est divennidu populare meda gratzias a sos ispettaculos ispassiosos suos e a sas friguras chi contant cun iscrombu sa vida de donzi die in s’isula. Naschidu in Aristanis, Urgu at incuminzadu sa carriera sua in su mundu de s’ispettaculu medas annos faghet. Fintzas dae s’incumintzu at leadu supra de su cataffale una comicidade simple e ispontanea, a s’ispissu ispirada a sa manera de faeddare,costumenes e situassiones tipicas de sa Sardigna.

In sos sketch suos contat cun lepiesa sa vida in sas biddas, su connottu e sas iscenas pitticcas de donzi die, iscenas in sas cales medas pessonas resessint a si reconnoschere in manera fatzile. In su mentres de sa carriera longa sua at partetzipadu a medas ispettaculos teatrales, programmas televisivos e in sa radio.

Cun sa manera sua de faghere nadurale e s’humor derettu est resessidu a conchistare su pubbricu de tottu s’isula. Meda de sas friguras suas sunt divennidas connoschidas pro itte presentant in manera chi divertit su meledu e sos comportamentos de sa zente sarda.

Sa comicidade de Benito urgu si fundat supra trempas simples e istorias chi naschent dae sa vida de donzi die. In sos ispettaculos suos faeddat a s’ispissu de sa vida in sas biddas, de su connottu e de su cambiu de sa sotziedade. In medas occasiones impittat fintzas paraulas e maneras de narrere de sa limba sarda, faghinde divennere sas mustradas suas fintzas prus accurtzas a sa cultura e realidade de s’isula.

Cun su colare de sos anno est divennidu unu puntu de relata po sa comicidade in Sardigna. Sos ispettaculos suos sighint a essere sighidos dae medas pessonas e sunt unu mamentu de divertimentu ma fintzas una manera po contare cun iscrombu sa vida e sos cambios de s’iscrocca. In prus de sa comicidade, Benito Urgu at semper mustradu attentzione meda pro sa cultura e su connottu de sa Sardigna.

Pro mesu de su tribagliu suo ad dadu unu contribbudu pro faghere connoschere e balorizzare mamentos importantes de s’identidade de s’isula, battinde supra de su cataffale istorias e situassiones chi faghent parte de sa vida e de sa memoria de sas comunidades locales.

Cun sa forma simple sua, deretta e ispontanea, Benito Urgu at fraigadu una carriera longa in su mundu de s’ispettaculu. Fintzas oe est cussideradu una de sas caras prus connoschidas de sa comicidade sarda e sighit a essere appretziadu dae pessonas de ingendras divressas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22