Orgosolo si rennovat e abbaidat a su tempus benidore de su turismu cun sa presentatzione de unu marcu novu de arrivu turisticu, creadu dae una truppa de istudiantes e ex istudiantes de s’istitutu Europeu de design de Casteddu. Su marcu, chi affigurat una cara risida accumpanzada dae su nuntzu “S’attera cara de sa Sardigna”, mustrat una bortada po su comune de sa Barbagia, chi serbit po affortigare s’identidade sua e sa bista turistica.

S’initziativa faghet parte de su progettu “Miradas”, unu pianu po torrare a vida sa cultura e su sotziale cun operas de signifficu in s’iscrocca de Orgosolo intro de su 2026. Cun d’una doda de 1,6 miliones de euros finantziados dae su Ministeru de sa Cultura po su Bandu Borghi de su PNRR,”Miradas” puntat a proponnere bisiones novas e balorizzare s’offerta turistica e culturale de sa bidda.

S’abbenimentu po presentare su marcu, est bistadu fattu custu manzanu in sos locales de s’ex Comune, in su Cursu Repubblica.

“S’usu de su marcu chi est unigu po tottu sas attividades de s’iscrocca, nos at a permittere de essere fintzas pius fortes e de essere reconnottos donzi borta chi amos a proponnere s’offerta turistica nostra” at nadu su sindigu Mereu. “Su marcu novu est de fundamentu po faghere connoschere sa figura de Orgosolo supra sos canales de su turismu locales e internatzionales, digitales e de su connottu, affortigande sa posada po sa cale semus connottos.

Su marcu est su risurtadu de unu tribagliu creativu e de chirca fattu dae sos istudiantes e ex istudiantes de su cursu de laurea in Media Design de su IED de Casteddu. “Sos istudiantes nostros ant tribagliadu partinde dae sa castiada e dae s’iscurtu, attoppande sa comunidade e accattande istorias e isperientzias de sos abitantes, de sos bisitadores e operadores de su turismu”, at ispiegadu Antonio Lupinu, direttore de su IED Casteddu.

Su marcu e sa font usados sunt unu disignu torradu a faghere ispiradu a sos murales conos de Orgosolo, immagines de sa bidda e de s’ispiritu suo artisticu e sotziale. In su mentres de custu abbenimentu, su team de su IED at illustradu su protzessu creativu, mustrande comente su design eppat intregadu elementos de su connottu e modernos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sardigna, unu modellu novu de continuidade aerea approbadu dae sa Cummissione.

Sa Cummissione Guvernu de s’Iscrocca de su Cunsizzu Regionale,ghiada dae Roberto Li Gioi(M5S), at dadu parrere arrimaderu a maggiorantzia, cun su tzentru dresta chi no at votadu, a su modellu novu de continuidade aerea chi est bistadu proponnidu dae sa Giunta Todde.

Pustis de aere intesu s’assessore a sos carrares Barbara Manca, su testu at a torrare cras in Giunta e at essere luego mandadu a su Mit po sa frimma de su decretu e po  essere pubbricadu in sa Gazzetta Uffitziale de s’Unione Europea. S’intentu est est de pubbricare su bandu intre su 29 de capudanni po faghere partire su serviziu novu dae  s’istiu 2026.

Sa continuidade at a durare battoro annos e at a tennere battoro fascas a die invetze de sas tres de como, pius frecuentzias, su controllu de sa disponibilidade cun sa possibilidade de azzunghere atteros bolos pagados dae sa Regione e cun tariffas pius bassas: su Casteddu-Roma po andare e torrare at a minimare dae sos 147 a sos 100 euros, cun atteros abbasciamentos de su 30% po sos piccioccos sutta de sos 14 annos e chentza pagare nudda po sos pizzinnos fintzas a sos duos annos chentza logu po si setzere. Sa numeru de chie at a tennere benefitzios at essere pius manna e at  incrudere militares,tribagliadores chi bistant in Sardigna,isportivos chi faghent parte de sotziedades isulanas, zente chi no bistat in Sardigna ma tenet parentes fintzas a su terzu gradu, chie tenet sa lezze 104 e sos tutores legales de sos chi istant in Sardigna.

In su bandu at essere cunsiderada menzus s’offerta tennica chi cussa accolomica po garantire sa calidade de su servitziu e bi at essere puru una cabbina de regia e unu controllu supra sa mobbilidade de s’iscrocca po regulare in donzi momentu sa continuidade nova. Sa porfia como po sa Sardigna at essere de traduire custa novidade in d’unu servitziu chi siat balidu e firmu abberu, capatze de rispondere a sas esigentzias de sos sardos e binchere sas crititzidades chi dae annos accumpanzant su dirittu a sa mobilidade de s’isula.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22