Sa casteddaja Frantzisca Serrau at accattadu unu risurtadu istravanadu in su campu de su truccu “semipermanente”, binchinde su primu postu in sa categoria Microblanding a su cuncursu de grandesa World Universal League of Permanent Makeup(Wulop) 2024, chi cust’annu si est fattu in Antalya in Turchia.

S’abbenimentu, chi at bidu sa partecipassione de espertos de pius de 70 paisos, est finidu deris cun d’una tzelebratzione de s’estremadia e de sa novidade in su mundu de sa “dermopigmentazione”, e Frantzisca Serrau at tentu su meritu de partetzipare po sa Sardigna a su primu postu de sa cumpetissione. Sa binchida de sa Serrau no est unu casu isoladu, ma sa fine de unu percursu de sutzessu: solu pagos meses faghet, diffattis, aiat binchidu su primu postu in sa cumpetissione svizzera de Wulop, garantindesi su dirittu de partetzipare a sa finale mondiale de Antalya.

Frantzisca, unica finalista de sa Sardigna, est bistada capatze de si faghere logu in mesu a sos menzus artistas de su truccu “semipermanente” a livellu de tottu su mundu, annodditandesi po tennica, pretzisione e talentu artisticu. In daesegus de su triunfu mondiale suo bi est una dedissione chi si podet acciappare puru in su progettu de impresa chi at fattu dae pagu tempus: in su 2023, Frantzisca at abbertu in Casteddu su tzentru esteticu GlamUp, su primu de sa tzittade tottu dedicadu a su truccu “semipermanente”.

Inoghe, gratzias a sa tennica nova e personalizada, apparat trattamentos de “microblanding”, una tennica chi dimandant semper de pius e chi permittit de assempiare sas chitzales in manera naturale e chi durat in su tempus, andande incontru a sas esigentzias de chie disizat una mirada semper curada e deffinida.

Serrau at espressadu emossione meda e ingraenzu po su riconnoschimentu retzidu, contande cantu siat bistadu importante po issa de podere rappresentare sa Sardigna e s’Italia in d’una cumpetissione de unu livellu gai artu. “Essere inie, in mesu a sos menzus artistas de su mundu, e torrare a domo con su primu postu est carchi cosa chi non si podet creere,”at declaradu. Est sa cunfirma chi sa passione e su tribagliu custante, battint sos risurtados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22