Un’abbenimentu chi dassat a bucca abberta at iscuttinadu su Kentucky in su mese de santuaini 2021, cando un’omine, decraradu mortu po un’infartu, si nde est ischidadu pagu prima che li che bogherent su coro, su figadu, sos prummones e sos runzones. Anthony Thomas, giai decraradu mortu, fit supra su lettu de s’ispidale prontu po s’operassione, cando un’operadora sanidaria at bidu chi bi fit carchi cosa chi no andaiat.

S’omine si moviat e pranghiat, faghinde cumprendere de essere ancora bivu, mancari sos duttores esserent nadu chi fit mortu. Sa familia de TJ at dezisu de contare s’istoria a tres annos dae cantu est sutzessu. S’omine aiat tentu un’infartu po aere leadu droga, e pustis de paritzos tentativos de lu faghere bivere, sos duttores aiant comunicadu a sos familiares chi non bi fint pius signales de attividade de su cherbeddu.

Aiant duncas detzisu de l’istaccare dae sas macchinas chi lu teniant in bida, pro itte TJ aiat dadu su cunsensu po sa donassione. Sa bortada est arrivada cando, intro de sa sala operadoria, sa sorre de s’omine at bidu chi sos ocros suos si funt abberinde, mancari sos duttores epperent assicuradu chi fit solu unu “reflessu”. Passadu su primu momento peroe, est bessidu a pizzu chi TJ non fit mortu deabberu: si nde fit ischidadu, e s’operassione est bistada suspesa in presse meda.

Su mese de bennarzu passadu, sa familia de TJ est bistada cuntattada dae su Koda, pustis chi una trabagliadora de s’ispidale aiat fattu connoschere custu casu, faghinde partire unu controllu supra su chi aiant fattu sos duttores. Koda at nadu chi no che bogant mai su coro, sos runzones, sos prummones e su figadu cando sas pessonas sunt ancora bivas e chi niunu benit mai forzadu a faghere sa donassione.

Custu casu est como sutta de scruccullu de su procuradore generale de su Kentacky e de un’agentzia federale po accrarare si tottu su netzessariu siat bistadu fattu commente narant sas regulas o si bi siant bistadas macchissias. S’ispidale at decraradu chi sa salude de sos malaidos est semper bistada sa cosa printzipale e chi s’ispidale azzuat sas familias po garantire chi sos disizos de sos malaidos po sa donassione benzant rispettados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Iscoperta una necropoli in su Nord Sardignain su mentres de sos tribaglios po un’approntu solare.

Un’iscoperta archeologica importante meda est bistada fatta in su Nord Sardigna in su mentres de tribaglios ligados a sa produssione de energia pulida. In sa zura industriale de truncu Reale-Sant’Agostino, accanta a Tattari,sos iscavos de ammaniada pro fraigare un’approntu solare ant fattu bessire a pizu una necropoli chi fintzas a oe non fuit bistada mai iscoperta.

S’accattu est sutzessu in sa zura curada dae su Consorziu Industriale de Tattari. Sos iscavos sunt incumintzados in su mese de martu de su 2024, cando sunt bistados cunviados sos controllos de su terrinu prima de fraigare s’impiantu. In su mentres de custos controllos sos archeologos ant acciappidu istrutturas sutta de terra e, sighinde cun sos iscavos, ant cumpresu chi si trattaiat de unu logu antigu de tumba.

Secundu su chi pensant sos espertos, su logu est importante meda po s’istoria e s’iscentzia. In sa zura sunt bistadas agattadas tres tumbas mannas iscavadas in sa rocca, istrutturas mannas chi faghent pensare a tumbas de balore mannu po sas populatziones chi biviant in custa zura in s’antichidade. S’iscoperta est fintzas prus interessante pro sa presentzia de decorassiones fittadas supra sas barras’e muru de sas tumbas. Si trattat de signos e pintas fittados in sa rocca in sos seculos passados. Custa fittadas faghiant parte de su connottu de sos interros de sas populatziones antigas de sa Sardigna e a s’ispissu teniant unu signifficu simbolicu o religiosu.

Po sos istudiosos custos elementos sunt importantes meda pro itte podent azzuare a cumprendere menzus comente biviant sas comunidades de su tempus passadu e cale esserant sas credentzias insoro. Sas tumbas e sas decorassiones diant podere dare novas supra su connottu, sa cultura e sa vida de sas pessonas chi biviant in s’iscrocca tattaresa mizza e mizza de annos faghet.

Sos archeologos ant a sighire a istudiare sa zura e analizzare tottu su chi est bistadu acciappidu in su mentres de sos iscavos. Donzi particulare novu diat podere accreschere sas informatziones chi serbint pro fraigare s’istoria de su logu. Custa iscoperta mustrat un’attera borta cantu sa Sardigna siat ricca de testimonzas de su passadu. Fintzas in su mentres de tribaglios modernos, comente cussos ligados a sa produssione de energia, podet capitare de acciappare andalas de tziviltades antigas meda chi contant s’istoria longa de s’isula.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22