Su zuighe de su tribagliu de su tribbunale de Nugoro at dae pagu reconnoschidu sa maladia proffessionale a unu ex trabagliadore de Orgosolo, chi aiat trabagliadu in sa fravica industriale de Otzana dae su 1974 asu 2015. S’omine, chi fit bistadu postu in isettu prima de sa pesione, est mortu su mese de frearzu passadu.

Sa sententzia, bogada a fora su 15 de santuaini pustis tempus meda”casi 8 annos” at cundennadu s’Inail a pagare a sa familia de su tribagliadore una rendida chi prevedid s’assigurazione chi tepent tennere tottu sos trabagliadores.

Su zuighe at istabilidu chi su linfoma de non Hodgkin follicolare e sa carentzia a sos prummones, causada dae s’asbestosi de s’incumintzu, funt ligados in manera deretta a su fattu chi su trabagliadore fit bistadu espostu a sustantzias chimicas perigulosas, commente benzene,nafta e trielina, chi si usaiant po cussu tribagliu. Custas sustantzias sunt bistadas cunsideradas commente sos printzipales motivos chi l’ant fattu ismalaidare fintzas a lu faghere morrere.

S’iscoperta de sa maladia, chi in d’unu primu momentu s’Inail aiat mandadu in daesegus in su 2016, est bistada reconnoschida gratzias a sas scruccullas cumplicadas meda chi ant fattu sos espertos. In mesu de sos documentos importantes, presentados in su protzessu, bi fit fintzas una relata iscientifica sos effettos dannosos de sa trielina.

S’Anmil, s’assotziu natzionale chi difendet sos invalidos e mucrados de su tribagliu, at tentu unu rolu importante po azzuare su trabagliadore e sa familia sua in su percursu legale. Mancari sa sententzia siat arrivada pustis chi su trabagliadore esseret giai mortu, sa viuda e sos fizzos ant a podere biere reconnoschidos sos dirittos insoro e de su trabagliadore.

Francesco Tolu, dirigente regionale de s’Anmil e chi faghet parte de su Cunsizzu Natzionala Amianto, at espressadu su dispiaghere suo po su ritardu de sa zustissia, ma at fintzas evidentziadu chi s’impignu de sa familia e de s’assotziu no est bistadu marriu.

Michele Tatti, presidente de Nugoro e dirigente natzionale de s’Anmil, at cunfirmadu chi s’assotziu at a dare semper azzudu a tottu sos trabagliadores e sos eredes insoro chi gherrant po ottennere su riconnoschimentu de sos dirittos insoro, mescamente in sos casos de sos problemas cun s’amiantu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Turismu, record novu po sa Sardigna: presentzias meda

Sos datos de s’istajone 2025 mustrados a sa Bit de Milano.

Su 2025 est bistadu un’annu eccetzionale po su turismu in Sardigna, cun numeros de record de bisitadores chi ant cunfirmadu s’isula intre sos logos prus disizados de su Mediterraneu. S’istajone at registradu una creschida custante in sos mesese de istiu e fintzas in s’istajone bassa, mustrande comente semper prus turistas seperent sa Sardigna fintzas in beranu e attonzu,attirados non solu dae sas plajas suas, ma fintzas dae sa ricchesa de cultura, natura e enogastronomia.

Sa capatzidade ritzettiva de s’isula est creschida meda, cun albergos e extra albergos novos, chi ant permittidu de accasazzare bisitadores chi arribant dae tottu s’Italia e dae fora. Intre sos istranzos sunt parizzos sos turistas chi arribant dae Germania, Francia, Svizzera e Regno Unito, mentres in Italia, sa Sardignas addurat unu logu preferridu po chie benit dae Lombardia e Lazio. Fintzas sos aeroportos de s’isula ant registradu una creschida de sos passezzeris, cunfirmande un’accreschimentu custante e s’interessu internatzionale pro sa Sardigna.

Addia de su turismu balneare, est creschinde meda s’offerta ligada a sos abbenimentos culturales, isportivos e a sa balorizzatzione de sos burgos e de sos caminos intre s’isula, chi at permittidu de dividere sos arrivos in atteras istajones e apparare esperientzias divressas. Abbenimentos comente su Giru de Sardigna in bicicretta e s’Americas Cup de bela in Casteddu sunt opportunidades importantes po faghere arribare bisitadores fintzas in sos meses chi benint cussiderados prus calmos, cun recaidas positivas po s’accolomia locale e po sos albergos de s’isula.

Su sutzessu de s’istajone 2025 cuffirmat s’importantzia istrategica de su turismu po s’accolomia sarda. Non si trattat solu de numeros e presentzias, ma de una parte chi dat unu contribbudu a mantennere bivu su connottu, balorizzare su patrimoniu naturale e culturale e creare logos de tribagliu. Sa Sardigna est mustrande de essere capatze de apparare unu turismu sustenibbile, divressu e de calidade, capatze de faghere arrivare bisitadores italianos e istranzos tottu s’annu.

Abbaidande a su tempus benidore, s’isula puntat a affortigare de pius custa creschida, imbestinde in sa promotzione internatzionale, in sa cura de sas iscroccas e in sa balorizzatzione de tottu su chi rendet sa Sardigna unica in sa bista de su mediterraneu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22