Michele Porcu, zovanu de 21 annos naschidu in Cabhuterra, est sighinde a si faghere connoschere a livellu internatzionale, cunfirmande s’impignu suo po sas chistiones globales mannas. Pustis de aere rappresentadu s’Italia e sa sardigna a su G7 de sos zovanos su mese de maju passadu, dae pagu at partetzipadu a su World Food Forum, chi li at dadu grandesa meda, e chi est bistadu fattu in sa FAO in Roma fintzas a su 18 de santuaini.

S’abbenimentu, chi at bdtu sa partetzipassione de pius de 10.000 zovanos delegados chi arrivaiant dae donzi parte de su mundu, est bistadu unu puntu de addobiu po discutire de su tempus benidore de sa laurantza e de s’alimentatzione. Su tema de su Forum, “Mandigu bonu po tottus, po oe e po cras”, at evidentziadu s’importantzia de garantire un’assentu de sos alimentos de su sartu chi si potat poderare e incrudere, e chi siat capatze de rispondere a sas esigentzias de sa populatzione mondiale e de sa nadura.

Po Porcu, custa est bistada un’attera esperientzia importante, pustis de cussa de su G7 de sos zovanos, inube aiat giai tentu manera de si cunfruntare cun sos leader de su mundu, proponninde initziativas po mandare a daenanti s’incluisione sotziale semper de pius. Ringratziande sa Young Ambassador Society po lu aere postu in mesu de custos abbenimento de balore internatzionale, at evidentziadu comente su cunfrontu supra sos temas importantes po su tempus benidore de tottu su mundu siat de fundamentu, mescamente po sos zovanos.

In s’interventu suo, Porcu at evidentziadu fintzas sa situassione de sa terra sua, sa Sardigna. At ispiegadu comente punnare a sa balorizzatzione de sos produttos tipicos de su logu e s’abberrere a sos mercados de fora, chi tiat podere essere una leva importante po mandare a daenanti s’accolomia de s’isula, chi medas bortas est penalizzada dae sa positzione geografica sua. Intames, at fintzas ammentadu s’importantzia de no ismentigare sas porfias de oe, comente sa pobertade alimentare chi est creschinde e chi collit miliones de pessonas in Italia, chi non si podent permittere unu pastu cumpridu donzi die.

Abbaidande a su tempus benidore, su zovanu de Cabhuterra non cuat sas ambitziones suas in sa politica. Cun d’unu disizu fungudu de sighire a dare unu contribbudu a su bene de sa sotziedade e de sa comunidade sua, at declaradu de essere in d’unu momentu de consideru po sa possibilidade de si candidare a sas eletzione chi ant a bennere.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Disaura in mare in Santa Maria Navarrese: duos piscadores mortos in s’affundamentu de sa barca insoro.

Santa Maria Navarrese- Est una zoronada chi at addurare imprentada in sa memoria de sa comunidade ozzastrina cussa de eris, merculis 11 de frearzu 2026.

Unu sinistru in mare,grave meda, at assorrobbadu duas vidas e at discossoladu sos de famiglia, amigos e cumpanzos. Unu piscaggiolu de Santa Maria Navarrese est affundadu attesu dae sa costa de Santa Maria Navarrese e su bilanciu est drammatigu: duos piscadores ant perdidu sa vida, e un’atteru est resessidu a si salvare.

Su sinistru est accadessidu eris  manzanu a tardu, mentres s’echipaggiu fuit impignadu a faghere sas cosas de donzi die. Pro motivos chi depent essere atzertados, sa barca paret chi eppat tentu problemas fintzas a che calare a fundu in d’unu trettu in su cale s’abba est meda funduda.

Sas cundissiones de su mare non fuint de sas menzus e custu diat podere aere dadu unu contribbudu e faghere divennere prus diffitziles sas manovras de emergentzia e sos succursos.

Sa cramida est partida in presse meda. Sos succursos si sunt attivados a sa lestra cun s’interventu de sa Guardia Costiera e atteras barcas chi bi fuint a lacanas. Un’atteru piscaggiolu chi fuit accanta est resessidu a accattare unu de sos tres marineris, istratzandelu dae sas undas.

S’omine, s’unicu chi si est salvadu, est bistadu affidadu a sas curas de sos duttores: sa cundissiones suas, secundu cantu si narat, sunt firmas. Po sos atteros duos marineris, cun dolu mannu, non bi est bistadu nudda de itte faghere. Sos duos piscadores arribaiant ambos dae s’iscrocca de Santa Maria Navarrese e fuint connoschidos meda in s’ambiente de sa pisca, chi est dae semper una parte de fundamentu de s’identidade e s’accolomia locale.

Eris sunt bistadas oras de segacoro po Santa Maria Navarrese e po totta s’Ozzastra. Supra su portu e in sas carrelas de sa bidda si alenaiat incredulidade e dolore, mentres sa nova s’isparghiat a sa lestra intre sas famiglias de sos piscadores e de sos tzittadinos.

In medas si sunt istrintos a inghiriu de sos parentes de sos piscadores, bocande a pizu bighinantzia e cordozu. Sas autoridades chi tenent sa cumpetentzia sunt tribagliande po chircare de cumprendere itte potat essere sutzessu e accrarare sos motivos de s’affundamentu. Fintzas a custu mamentu non si podet escluire nudda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22