Sa de deghe editziones de su Festival Premiu Emilio Lussu si est concruida in Casteddu cun d’una tzerimonia chi at emossionadu. Dominiga 6 de Santuaini, su direttore artisticu Alessandro Macis e sa direttora de s’organissasione Patrizia Masala ant premiadu s’iscrittora, giornalista e conduidora de radio Loredana Lipperini, dandeli su Premiu Emilio Lussu a sa Carriera. S’opera l’at fatta su mastru Giampaolo Mameli, chi arribat dae Santu Sperau.

“Est un’onore mannu retzire su Premiu Emilio Lussu a sa Carriera” at affirmadu Lipperini, chi fit meda commovida, supra su cataffale de sa Sala Casteddu de s’Hotel Regina Margherita. “Emilio e Joyce Lussu ant tentu po a mie meda signifficu, e torrare a Casteddu est semper un’emossione cadria. S’urtima borta chi so bistada inoghe, fui cun Michela Murgia. Custu ammentu est durche e ranchidu a su mattessi tempus, ma so cuntenta de torrare a acciappare sa Sardigna in su caminu meu. Michela est semper presente: in sas paraulas suas, in sa fortza sua e in sa bellesa de s’intelligentzia sua, e po custu motivu so meda cuntenta de essere inoghe.”

Su sapadu prima, su 5 de Santuaini, est diventadu uffitziale s’ammeddigu de su FPEL(Festival Premiu Lussu) de Casteddu e su FOLIO(Festival Literario Internacional de Obidos) in Portogallo. Sa tzerimonia at bidu sa partezipatzione de Margarida Reis, assessore a sa cultura de sa tzittade de Obidos, Paulo Santos, direttore artisticu de su Festival Folio, Maria Francesca Chiappe, assessore a sa cultura de su comune de Casteddu, e
Alessandro Macis, direttore artisticu de su FPEL, chi ant firmadu unu protocollu de collaborassione iscientifica e culturale.

Pius a daenanti, sa giuria internatzionale de su cuncursu po sos contos e sas esperientizas imprentadas, cun presidente Guido Conti e cun Bruno Quaranta, Miruna Bulumete, Reiner Michiel Speelman e Manuela Ennas, at premiadu sos primos classificados. Po sa Saggistica Edita, su premiu est bistadu dadu ex aequo a “45 milioni di antifascisti” de Gianni Oliva e “Il nemico di Mussolini” de Marzio Breda e Stefano Carretti. Po sa Narrativa Edita, su primu premiu est andadu a “Invernale” de Dario Voltolini, cun d’unu fentomu personale po “Umor vitreo” de Paolo Musa.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Einstein Telescope, sa Sardigna puntat supra Sos Enattos: un’istrumentu pro istudiare s’univressu.

S’Einstein Telescope est un’istrumento iscientificu addaenantis medas chi at a permittere a sos istudiosos de iscrudignare sas undas gravitatzionales chi arribant dae s’univressu primarzu e de istudiare sos fenomenos de su trettu chi oe non podimos ancora biere.

Si trattat de unu osservadoriu de ingendra nova chi nos at a podere azzuare a cumprendere menzus comente est naschidu e creschidu s’Univressu. Gratzias a sa dilighesa manna sua at essere possibbile iscrudignare abbenimentos cosmicos istravandos comente sa tumbada intre toffos nieddos o intre istellas de neutrones abbeniddos miliardos de annos faghet.

Sa Sardigna at a presentare ambas sas possibbiles formas de s’osservadoriu: cussa a triangulu e cussa cun duas istrutturas a forma de L. Carchi istudiu at mustradu chi sa soluzione cun duas L diat podere dare risurtados iscientifficos menzus e minimare carchi arriscu tennicu. S’idea est cussa de faghere custa solutzione imparis a sa Sassonia, creande una collaborassione intre Istados Europeos divressos supra unu de sos disignos iscientificos prus importantes de sos annos imbenientes.

Pro sos iscientziados su situ de Sos Enattos, in s’iscrocca de Luvula, est unu de sos logos menzus in su mundu pro fraigare custu osservadoriu. Est difattis una zura meda muttiga dae su puntu de bista sos terremotos e casi briva de cale si siat burdellu motivadu dae sas attividades de s’omine. In prus sa rocca presente sutta de terra est adatta meda a sos iscavos netzessarios pro fraigare sas istrutturas chi ant a accasazzare sos istrumentos iscientifficos.

Su fraigu suo diat podere mustrare un’occasione manna po s’iscrocca. Unu disignu comente custu podet battire imbestimentos novos e occasiones meda de formazione. Sa presentzia de s’osservadoriu diat podere favoressere sa creschida de sa chirca iscientifica e apparare possibilidades novas pro istudiantes,chircadores e tennicos chi tribagliant in sas zuras de s’iscientzia e de s’inzennieria.

Unu fraigu iscientificu gai importante diat podere battire beneffissios fintzas a s’accolomia locale. A inghiriu de su disignu diant podere naschere attividades novas ligadas a sa chirca, modernissassione e servitzios chi serbint pro accotzare unu tzentru iscientificu internatzionale mannu meda. In prus diat podere affortigare sa collaborassione intre universidades, tzentros de chirca e istitutziones europeas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22