Sa depressione est intre sos istorbos de sa mente pius ispartos e sgangagliantes a livellu de tottu su mundu, cun d’unu effettu de signifficu po effettu, revudadesa e costos. In Sardigna, sos duos annos 2021-2022 ant evidentziadu resurtados chi iffroscant meda: s’isula at registradu su numeru pius artu in Italia po prevalentzia de “signales depressivos e durosos”.

Sunt pius de 160.000 sos sardos chi tenent problemas. Sicundu sa proffessoressa Federica Pinna, durettora de sa Psichiatria de s’ispidale Santu Juanne de Deus, sos fattores printzipales chi faghent pigare s’arriscu de sa depressione in Sardigna sunt sa poberesa, sa mancantzia de unu tribagliu, abbenimentos istressantes in sa vida e maladias fisigas. Sas classes pius fartadas sunt sas feminas e sos betzos, a s’ispissu pius debiles in daenanti a custos fattores.

Mancari custos numeros preoccupent meda, unu elementu assuprit: su “Appitzicu supra sa Salude Mentale” mustrta chi solu 10,5 pessonas donzi 10.000 abitantes in Sardigna, sunt curadas po depressione dae sos Servitzios de salude mentale pubbricos, su numeru pius bassu a livellu natzionale. Custu, evidentziat unu problema de signifficcu: mancari s’isula tenzat unu numeru artu abberu de casos de depressione, in pagos dimandant azzudu a sos servitzios pubbricos.

Mancari non bi siant listas de attesa e sa bisita non si paghet, medas pessonas preferrint de andare dae sos privados o atteros duttores chentza ispecializzatzione. Unu de sos motivos printzipales de custa adesione bassa a sos servitzios
pubbricos de salude mentale est sa marca sotziale chi a dies de oe inghiriat sa psichiatria. Medas timent de essere deffinidos comente “malaidos de mente” e preferrint evitare de chircare azzudu in sos canales uffitziales. Custu, giughet a un’aderentzia scarsa a sas curas, e cust cosa aggravat meda de pius sa situassione, pro itte sa depressione si
non benit curada o curada in manera chi no est zusta, podet tennere cunseguentzias devastantes siat a livellu personale, ma puru sotziale.

In daenanti a custa situassione, sa psichiatra evidentziat s’apprettu de faghere unu pianu de fundamentu po chircare sos fattores de arriscu  che bogare sas traessas chi impidint su passu a sas curas. Est detzisivu bischidare su meledu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sos aineddos biancos de s’Asinara: vardianos mudos de s’isula.

S’Isula de s’Asinara custoit una prenda naturale unica: sos aineddos biancos. Custos caddinos pitticcos, chi tenent unu bentinnu innidu e ogios medas bortas craros o colore ‘e chelu, sunt sa frigura chentza nde discutire de s’isula e una de sas attrassiones suas pius prenas de misteru.

Sos aineddos biancos de s’Asinara pertoccant a sa mattessi casta de sos ainos comunes, ma si distinghent po una mudada genetica chi li dat su tipicu colore biancu insoro. Non si tratta de arbinismu beru, ma de una condissione giammada leucismo, chi intzidat sa depigmentazione de su bentinnu chentza influentzare sa pigmentazione de sos ogios.

Sas issidas de custos animales sunt intzertas. Carchi istudiosu pensat chi siant bistados introduidos in s’isula dae sos monagos camaldolesos in su Evo mesanu, mentres atteros pensant chi s’erentzia insoro arrivet dae tipos battidos in su seculu XIX, fortzis dae famiglias nobiles sardas o dae marineris chi arrivaiant dae su Nord Africa.

Mancari a s’incumintzu si penseret chi esserent una casta distinta, istudios geneticos ant mustradu chi su colore particulare insoro est teppidu a unu gene retzessivu, eredadu dae ingendras de ainos presentes in s’isula. S’ Asinara, oe Parcu Natzionale e zura marina amparada, est unu logu agreste e intregu, inube sa nadura si est isfroscada in ecchilibriu cun s’istoria e sas mudas umanas. Po deghinas de annos s’isula est bistada una presone e, daboi, at accasazzadu una presone de massima siguresa, allindande s’intrada a su pubbricu e contribbuinde a nde preservare sa bista e sos animales.

In sos urtimos annos, su Parcu Natzionale de s’Asinara at cuniadu disignos de controllu e tutoria po garantire sa vida de custa particulare populassione. Sos aineddos biancos, difattis, non sunt medas e s’arriscu de essere carrales diat podere minettare sa salude genetica insoro.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22