S’Assotziu Italianu de Oncologia Meiga(AIOM) at fattu una probosta reale po cumbattare su fumu e a su mattessi tempus poderare su Servitziu Sanitariu Natzionale : creschere de 5 euros su pretziu de donzi buetta de sigarettas. Sa mesura, chi tenet s’iscobu de minimare su cossumu de tabaccu, est bistada presentada in su mentres de una cunferentzia istampa in su Senadu po sa campagna SOStenereSSN, fatta dae Aiom, Fundatzione Aiom e Panorama de sa Sanidade.

Sa probosta tenet duos iscopos printzipales: minimare su cossumu de tabaccu, chi est responsabbile de su 90% de sos bugnos a sos prummones, e recuberare dinari po su Servitziu Sanidariu Natzionale(SSN), istimande una bintrada de casi 13,8 miliardos de euros.

Custu tipu de “tassa de iscopu”, no solu tiat faghere minimare su cossumu de sigarettas, ma tiat dare unu contribbudu po agguantare sos costos ligados a su trattamentu de sas maladias chi battit su fumu e po pagare sas campagnas de educassione, mescamente po sos zovanos.

Paisos commente sa Frantza e sos Istados Unidos ant giai pigadu politicas de creschida de su pretziu de sas sigarettas po minimare su cossumu, cun risurtados bonos meda. In Italia, su 24,5% de sos mannos fumat, e su bugnu a su prummone sighit a tennere un’effettu forte meda, mescamente supra sas feminas, in mesu de sas cales si est bida una creschida de su 16% de sa mortalidade ligada a custu tipu de bugnu dae su 2007 a su 2019.

Saverio Cinieri, presidente de sa Fundatzione Aiom, at evidentziadu chi mancari sas campagnas contra su fumu eppant tentu carchi effettu, sa fortza e sa mortalidade de su bugnu a su prummone addurant ancora artas. No esistit una predissa sigura po su cossumu de sigarettas, duncas interrumpere su costumu de su fumu est sustantziale.

S’initziativa at retzidu s’accottu de figuras politicas comente Maria Domenica Castellone e Beatrice Lorenzin, chi cherent favoressere sa creschida de su pretziu de su tabaccu po mesu de unu emendamentu in sa leze de bilanciu. Lorenzin at evidentziadu s’importantzia de custa mesura, ammentande commente, giai in su 2014, cando fit Ministru de sa Salude aeret proponnidu una creschida de 50 tzentesimos a buetta, attoppande peroe resistentzias dae parte de sas istitutziones.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Casteddu in difficultade: terza derrotta una fattu de s’attera e sa Cremonese si accurtziat.

Su Casteddu est bivinde unu mamentu complicadu meda.S’isquadra at perdidu po sa terza borta una fattu de s’attera e como sa classifica faghet un’attera borta frea. Sas atteras isquadras chi battagliant pro si salvare sunt recuberande puntos, e su vantazu de sos ruju e blau si est minimande semper de prus.

Su peus nuntzu est arrivadu dae Parma, inube sa Cremonese at binchidu.Cun custu risurtadu est arribada a solu tres puntos dae su Casteddu. Custu cheret narrere chi sa battalla po addurare in sa categoria est abberta de su tottu.

Sos numeros de sas urtimas partidas sunt negativos meda. In sas urtimas sette partidas, su Casteddu at leadu solu duos puntos. At perdidu chimbe bortas e pareggiadu duas. Est unu de sos peus risurtados intre sas isquadras chi chircant de si salvare. Eppuru, pagu tempus faghet, sa situsassione pariat divreassa meda: tres binchidas una fattu de s’attera aiant fattu isperare in d’unu finale de istajione prus tranchillu. Pustis de cussu mamentu positivu,peroe, s’isquadra si est frimmada. Fintzas sa sotziedade aiat leadu detzisiones pensande chi su peus esseret passadu, comente sa bendita de Luperto propriu a sa Cremonese, chi como est una cuncurrente diretta.

Sa classifica est ancora intzerta. Fintzas atteras isquadras si podent accostare o binchere su Casteddu. Sa Fiorentina diat podere andare a daenantis, mentres su Lecce podet tennere sos mattessi puntos. Tottu at a dipendere dae sos risurtados de sas partidas imbenientes prima de sa frimmada. Su mese de Aprile at essere importante meda. Su Casteddu at a deppere accomettare su Sassuolo in domo sua e pustis at a giogare in domo contra sa Cremonese. Sunt duas partidas de fundamentu pro cumprendere comente at andare a si accabbare s’istajone.

S’isquadra at a torrare a si allenare martis in Assemini, ma bi ant  essere medas ausentzias. Carchi giogadore est impignadu cun sa natzionale sua, comente Caprile e Palestra cun s’Italia. Fintzas Kilicsoy e Obert non bi ant a essere, gai comente Sulemana e fortzis Litetas, chi no est a su menzus. Unu nuntzu bonu arribat dae Borrelli, chi est recuberande e diat podere giogare dae s’incumintzu de sa prossima partida. Sa torrada sua est importante, pro itte su Casteddu at sinzadu pagu in sas urtimas partidas.

Como su Casteddu non podet prus isbagliare. Serbit una reatzione lestra pro evitare de finire in mesu de sos aggios. Sas partidas imbenientes ant a essere detzisivas pro si salvare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22