Sa Regione Sardigna at azzorronadu s’Irbirgu suo Regionale de accunnortamentu a sos cambiamentos de su tempus. Custu documentu evidentziat s’apprettu a mescamente a livellu locale, po rispondere a sos perigulos de su tempus, chi semper de pius amminettant s’iscrocca de sa Sardigna.

Sos cambiamentos de su tempus sunt apprettande, bogandesi a campu cun istallidos, comente cunfirmadu dae sos iscenarios esaminados intro de su disignu.

In custu cuntestu, sa SRACC evidentziat su bisonzu de adattare in presse puliticas, irbirgos e istrumentos po ordiminzare, poninde impare sas istitussiones locales. Custas urtimas sunt diffattis sas responsabbiles printzipales de s’attuatzione de assiones de accunnortamentu, chi sunt de faghere cun caminos de intzidida chi tenzant contu de sos problemas de donzi iscrocca. In mesu de sas prioridades bi est su cambiu de sos istrumentos po sas tziddades e s’assebestu de aziones reales po minimare sos arriscos de su tempus, ghirandelos a livellos atzettabiles.

In accottu a custos protzessos , s’Assessoradu a s’Amparu de s’Ambiente at postu in campu 20.000 euros po finantziare initziativas de intzidida po s’adattamentu de su tempus a livellu locale. Sos comunes de sa Barbagia de Seulo e Gairo ant regortu sa porfia, faghinde partire disignos de partetzipazione de sas comunidades po torrare a orientare sa progettatzione de s’iscrocca.

S’attentzione est destinada po su pius a s’arriscu de siccagna, unu perigulu chi amminettat sas attividades locales,
su benessere de sas pessonas e de s’ambiente. In sos meses passados, in custos comunes est bistadu fattu un’istudiu artu supra su cambiamentu de su tempus e sos problemas de s’iscrocca.

S’intentu fit de assebertare sos arriscos printzipales e ponnere in campu sas aziones netzessarias. S’irbirgu prevedit interventos a accabbu curtzu e longu po minimare sos arriscos, diffendere sas truppas pius a arriscu e favoressere pratigas chi potant agguantare, po garantire su cuntrastu de s’ambiente e de sas accolomias locales. Custos protzessos de progettatzione nova si fundant supra sa chirca de elementos ambientales, sotziales e accolomicos chi determinant sa debilesa de s’iscrocca.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa Grutta de sa Pipera de Casteddu, intre istoria e paristoria.

A pagos passos dae su tzentru de Casteddu, accanta a sa carrela chi che leat a su campusantu de Tuvixeddu, si agattat unu de sos monumentos pius ammaghiantes e prenos de misteru de sa tzittade:sa Grutta de sa Pipera. Est unu sepurcu romanu iscavadu in sa rocca, de su I° seculu d.C., divennidu tzelebre no solu po sa bellesa architettonica sua ma fintzas po sa paristoria chi lu inghiriat.

Sa tumba fuit bistada fatta fraigare dae Lucio Cassio Filippo, nobile romanu chi arribaiat dae Cartagine, po sa muzzere Atilia Pomptilla, morta in Casteddu in su mentres de su disterru de su maridu. Sas iscrissiones intro de su sepurcu contant un’istoria de amore e devossione: secundu su connottu, Pomptilla diat aere donadu sa vida sua a sos deus po sarbare cussa de su maridu, chi si fuit ismalaidadu in su mentres chi fuit in Sardigna. Ma su chi rendet sa Grutta ancora pius enimmatica est sa presentzia, isculpida in sa fatzada, de duos terpentes imboligados.

Dae inoghe naschet su nomene “Grutta de sa Pipera”. In su tempus, a inghiriu de cussas friguras sun bennidos a pizu paritzos contos populares. Bi est chie at interpretadu sos terpentes comente conas de eternidade e protessione de s’anima de sos mortos, atteros bi ant bidu unu zubilu a sos cultos de s’antiga Roma o unu signu magicu capatze de che istesiare sos ispiritos malos.

Oe sa Grutta de sa Pipera est unu de sos logos archeologicos pius bisitados de Casteddu e sighit a esercitare un’ammaju forte supra sos bisitadores. S’aera sua suspesa intre contu e istoria, s’amore eternu chi ligat Pomptilla e Lucio Cassio Filippo e s’aria de misteru de duos terpentes isculpidos in sa pedra faghent de custu logu una cona de sa tzittade, capatze de contare no solu unu picculu de s’istoria romana sua ma fintzas sa fortza chi non morit de sas paristorias chi resistint a su tempus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22