Una prantada manna meda de marijuana, cun 1048 piantas de casi tres metros de artaria, est bistada iscoperta e secuestrada in sas campagnas de Talana dae sos carabbineris, in su mentres de un’operassione fatta su manzanu de su 3 de capudanni.

Su provvedimentu l’ant fattu sos carabbineris de Arzana e Lanusei, azzudados in manera detzisa dae cussos de Talana, in d’una operassione letrangosa e organizzada chi at fattu iscoperrere un retza importante meda de campos contivitzados in manera chi no est permittida. Sas piantas, s’artaria de sas cales andaiat dae sos 260 a sos 310 tzentimetros, fint creschinde bene meda, e, si tiant essere postas in su mercadu, bi tiat essere bistadu un’incassu de casi 2,5 miliones de euros, evidentziande su balore de sas piantas e s’importu chi custu tiat aere tentu supra su trafficu locale de sustantzias abberelantes.

S’operassione at giuttu a s’icoperta de unu zassu organizzadu bene meda po su manizzu. Sos carabbineris, difattis, ant acciappidu unu sistema complicadu meda po abbare, cun canneddos chi garantiant chi s’abba arriverat in donzi momentu a sas piantas, addìa duas gisterras in PVC, usadas commente depositos po abbare tottu sa prantada.

Custu tipu de approntu mustrat s’organissasione e sos avios usados dae sos responsabbiles, chi aiant fraigadu un’operassione de laurantza chi no est cunsentida dae sa lezze.

Ma non solu. In sa caminera chi che giughiat a sa prantada, fint bistadas postas trappulas po iscattare fotograffias, mustrande su livellu de attentzione chi teniant sos manizzadores po controllare e diffendere su logu dae s’arrivu de istranzos.

Custos apparitzos, chi si usant po su controllu de zuras inube non bi est nissunu, cunsentint de iscattare fotograffias o registrare video cando passant sas pessones, fruninde a sos criminales una cramida de prevensione si bi passaiat calicunu. Tottu su materiale, accansande fintzas sas piantas, su chi serbiat po las abbare e sos sistemas po sas fotograffias, est bistadu secuestradu dae sa politzia, chi commo est faghinde scruccullas po chircare de cumprendere chie sunt sos responsabbiles de sa contivizzatzione. Sos controllos supra su materiale chi est bistadu secuestradu tiant podere frunire atteros arvios chi podent servire po accattare sos chi bi sunt in daesegus de custa attividade chi no est permittida.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22