Sa pratzitta de Portu Cherbu at fattu de curnisa a sa tertza edissione de su Longevity Fest, su primu festival a su mundu tottu dedicadu a sa longa vida. S’abbenimentu, chi si est affirmande in manera lestra commente unu fentomu internatzionale po espertos e appassionados de su tema, est bistadu conduidu dae Ambra Pintore e at apparadu una serana ricca de emossiones e temas de calidade.

S’abbertura est bistada intregada a Pedru Mereu, direttore artisticu de su festival, chi at dadu su benennidos a su pubbricu e at introduidu sos momentos divressos de sa serana. In mesu de custos, unu de sos pius de signifficu est bistadu s’intregu de su Longevity Award a Giulio Mogol, tzelebre commente autore. Custu riconnoschimentu, chi rappresentat sabidoria e vivesa, est bistadu intregadu dae su proffessore Gianni Pes , connoscidu po s’iscoperta de sas Blue Zones, sos logos de su mundu inube sas pessones bivent de pius.

Sa serana est andada a daenanti cun sa presentazione de su documentariu “Arzachentos”, affiladu dae su mattessi Mereu. Su film iscumbattat su fenomenu de sa longa vida in Arzachena, fruninde una bista unica supra sas vidas de sos chentenarios de sa bidda e supra su connottu chi favoressit una vida longa e sana. Su documentariu at accattadu s’iscopu cun su pubbricu, po sa capatzidade sua de contare in manera affriscionosa sa cultura e sos segretos de una longa vida.

Daboi, si est tenta una dibatta interessante meda. In su mentres de sa dibatta, est bessida a campu sa volontade de su sindigu de cunviare un’istudiu fungudu supra sa vida longa in su columene suo, affidandesi a s’esperientzia de su proffessore Pes, chi at istudiadu fintzas sos chentenarios de s’Ozzastra, attera Blue Zone importante meda.

S’urtima parte de sa serana at tentu commente tema sa Costa Rica, cun su documentariu “Kentannos” de Victor Cruz, chi iscumbattat sa vida de sos chentenarios de sa penisula de Nicoya, una de sas Blue Zones de su mundu. Custu festival, unicu in sa zenia sua, sighit a essere unu ponte intra connottu, iscientzia e cultura, apparande un’opportunidade po meledare supra commente sa vida longa non siat solu un’accabbu de segudare, ma unu viazzu chi appartennet a sa comunidade, maneras de vida e connessuras umanas fungudas.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Su Pevero Mannu: a s’iscoperta de sa prenda naturale de sa CostaIsmeralda.

Intre sas abbas biaittas de sa Costa Ismeralda e sos corongios ammuntados de matta mediterranea, su Pevero Mannu si annodditat comente una de sas baias pius ammaghiantes de sa Sardigna. Sa zura leat su numene dae su mattessi gulfu, deffinidu dae plajas de rena crara chi si fundent cun calas de rocca e puntas de granitu, creande una bista unica chi cambiat cun sa lughe de su sole.

Su prantamine accanta est tipicu de su mediterraneu: ghiniperos intortados dae su bentu,murta nuscosa e prantamine bassu chi arribat finzas a sos arroccarzos, apparande furriadorzu a paritzas zenias de puzzones e animales pitticcos. Sos caminos chi rugant sos corongios de su Pevero permittint de biere bistas chi che bogant s’alenu, intre nuscos fortes e bistas supra su mare, mentres sa biodiversidade marina apparat fundales gristallinos prenos de pisches colorados e arritzones’e mari.

Sas plajas de sa zura, comente Pitticcu e Mannu Pevero, sunt perfettas no solu po si godire su mare ma fintzas po abbaidare sos animales de sa costa:garzas mannas,caos mannos e marangones chi bolant subra de sas abbas, mentres sas roccas accasazzant gavaros e cotzulas. In beranu, sos giassos e sas ischinas de rena frorint cun muschiones agrestes e prantas raras, faghinde divennere donzi passizzada un’esperientzia uniga. Addià sa bellesa de sa bista, su Pevero Mannu custoit andalas de s’istoria geologica de sa Sardigna:bessidas a campu de granitu modellados dae su bentu e dae su mare chi contant miliones de annos de frazadura e cambiamentu ambientale. Sas bistas dae s’artu de sos corongios donant una bista larga supra sas atteras baias de sa Costa Ismeralda, mustrande unu musaigu de mare, roccas e prantamine innidu.

Unu ecosistema chidrinu ma istravanadu, chi cumbidat a passizzare,iscumbattare e rispettare s’ambiente, attesu dae su cramore de su turismu ordiminzadu. Inoghe est su mudore de su bentu e de su mare s’ interprete.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22