Sa contestura a tempus de sa Plata Nazzari est oramai casi cumprida, marcande unu momentu importante meda in sos ammanizos po su cambiu de sos operadores de su mercadu tzivicu de San Benedetto. Custu mercadu, puntu de relata po sa comunidade locale, at a serrare in pagu tempus po unu nou e ambitziosu disignu de accontzu de tres annos, chi puntat a modernizzare e mezzorare sas contesturas.

Su cambiu de sos operadores si prenettat in sos meses de santuaini e sant’Andria, tempus perfettu po non perdere su momentu in su cale sa zente comporat de pius, tottu ligadu a sas festas de Nadale, in sas cales sa bendida de petta e pische segudant sa chima.

Su sindigu de Casteddu, Massimo Zedda, at frunidu inghiriamentos pretzisos supra de custos isviluppos, in su mentres de una cunferentzia stampa chi at fattu in carrela Sant’Alenixedda. In cussa occasione, Zedda at puru annuntziadu s’abertura fra pagu tempus de unu parchizu nou da 150 postos po sas macchinas, accanta a su Parcu de sa Musica. Custu parchizu at a tennere ses tzellas po infriscare, pensadas po favoressere sos mercaderis de su mercadu in custu momentu de cambiu.

In pius, po agilitare s’intrada a sa nova contestura a tempus, chi at a naschere a paga distantzia dae sa plata Giovanni XXIII°, at essere postu unu assentu de autobus chi at ameddare tottu su cuartu a sa sede nova.

In sas pius accurtzas duas chidas si prenettat un’accorrada cun sos meres de sos box de su mercadu po discutire de sos particulares de su cambiu. Su sindigu at assicuradu sos chi fint presentes chi s’assentu de sos operadores in sa nova contestura a tempus, at essere ordiminzada in manera de mantennere sos imbitzos de sos clientes de su mercadu de San Benedetto, garantinde una continuidade in su servitziu.

Una borta chi at essere accabbadu s’accontzu de su mercadu de San Benedetto, sas contesturas a tempus chi in custu momentu sunt in fase de allestimentu tiant podere essere traslatadas a su mercadu de carrela Quirra, apparande gai una solutzione a tempus puru po cust’attera zura de su negossiu. Cando at faeddadu po sa prima borta, su sindigu Zedda at puru accommettadu su tema de su mezzoru de sa viabilidade e de sos parchizos in s’ala de viale Trieste, proponninde una iscontzadura e unu fraigu nou de su parchizu cun pius pranos de sa carrela Caprera.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa regione de Sardigna torrat a bogare a pizu s’ente in azudu de sas artesanias artìsticas de su connotu.

S’Istituto Sardu Organizazione Tribàlliu e Artesania, pius connotu comente I.S.O.L.A., est torradu a nàschere a pustis de unos vint’annos. S’ente fuit mortu in su 2006, a pustis de una leze regionale, e su chi faghiat fuit passadu in manos de s’Agentzia Sardigna Promotzione, chi poi fuit morta issa e-totu in su 2015.

Oe sa Regione Sarda at detzisu de puntare e de pònnere a cùrrere dinare torra in custas cosas, pensande chi siant cosas de importu mannu po mezorare sas artesanias sardas. Sa Giunta Regionale at fatu unu disegnu de leze chi at sa punna de torrare a fàghere dae nou s’I.S.O.L.A.

Ant iscritu bator tìtulos e sèighi partes, cun su finis non solu de ofèrrere a sos artesanos una ghia, ma fintzas de dare nàschida noa a s’economia sarda e de favorire betadas de manos in sa categoria de custos triballiantes, chi gai si podent azuare pari-pari. Sas artesanias artìsticas in Sardigna sunt semper istadas de importu mannu: famados meda sunt sos tapetos e sas mantas de Samugheo, sas zarritas de Aristànis, sas prendas in filugrana de Durgale e sas màscaras de linna de Otzana, sas canisteddas de Flussio… e sunt medas sas cosas chi si faghent in Sardigna, e cadauna at sa bellesa sua.

Est unu patrimòniu culturale e econòmicu de s’ìsula nostra, cun connoschèntzias e sabiores costoidos in sas famìlias chi los ant imparados dae babbu in fizu e dae mamma in fiza. Custos annos chi nos mancaiat un’ente comente s’I.S.O.L.A. paret chi nos mancherat sa ghia po amparare totu custos tribàllios.

Chi siat torrada a nàschere s’I.S.O.L.A. est una cosa bella abberu. S’istituto s’at a interessare de azuare sos artesanos in su tribàlliu insoro: dae su fatu de imparare a sos zòvanos a fàghere custas cosas in manos, cosa chi paret chi si esserat perdinde, a su fatu de las trasmìtere po su tempus bennidore. De importu mannu at a èssere puru s’azudu chi s’I.S.O.L.A. at a dare po su cummèrciu. B’at àere poi trastes noos chi ant a favorire s’intrada de su design de sas dies de oe in sas mustras e in sos manizos de su tempus coladu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22