Su murale in onore de Michela Murgia, creadu dae sa street artist Laika e ispiradu a su titulu de su libbru bessidu a poi de sa morte sua “Ammentademi commente bos parede”, est casi po essere finidu supra de sa fatzada de su comune V in Roma. Custu progettu, propostu dae Arcigay e fattu chentza nisciuna ispesa po su comune, at iscadenadu medas contierras, mescamente dae parte de Fratelli d’Italia(FdI).

Fintzas dae su 17 de lampadas, die in su cale sa proposta est bistada discutida in su cunsizzu municipale, su crompimentu de su murale at addobiadu opposissiones. Sos cunsizzeris de su Partidu Democratigu(PD) e de Roma Futura ant accotzadu s’initziativa, riconnoschindene su balore culturale e sotziale, mentres sos de FdI ant pesadu dudas supra de sa mancantzia de elementos pretzisos de su tipu de murale e ant cuntestadu su seperu de sa dipendentzia commente unu logu adattu po s’opera.

Daniele Rinaldi, cunsizzeri de FdI, at espressadu critigas meda affirmande chi su progettu non tenet unu ligonzu cun s’iscrocca e at evidentziadu sos discumbenios cajonados a sos chi andant a pe in su mentres de sos tribaglios. In pius, s’assotziu Pro Vita & Famiglia at espressadu affuscos po s’usu de benes pubbricos po cussa chi attibint commente diffusione politica e de sas ideas de su movimentu LGBTQIA+. Ant puru bogadu a pizzu chistiones supra sa sicuresa de su tribagliu cando fint faghinde su murale, criticande sas cundissiones in sas cales tribagliant sos artistas. Po cumplicare de pius sa situassione, sa detzisione de faghere partetzipare sas iscolas de su logu in faina de notissias supra Michela Murgia at allummadu atteras contierras. Sos chi si opponent, pensant chi Michela Murgia tenzat una natura chi dividit e no siat adatta a essere promovida in d’unu cuntestu educativu.

Mancari sa critigas e sas perricas, s’opera de Laika est andande a daenati lestra e si prevedit chi at essere finida intro de una chida. Claudio Poverini, capu de su gruppu PD in su cunsizzu comunale, at cunfirmadu sos tempos e at rebbaidu s’accottu de su partidu a s’initziativa, evidentziande s’importantzia de disignos culturales chi tzelebrant figuras importantes commente Michela Murgia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22