S’annu iscolasticu 2024-2025 at incumintzare in Casteddu, cun d’una tzerimonia de abbertura manna meda, chi at a biere s’intzidida de su Presidente de sa Repubblica,Sergio Mattarella. Custa tzelebrassione ideale est unu momentu de signifficcu po sa comunidade educativa e po sa natzione intrea, pro itte signat s’ incumintzu de unu ciclu iscolasticu nou.

Dae su 2015, s’abbertura de s’annu iscolasticu benit fatta in manera mobbile, gratzias a s’initziativa “Tottus a iscola”, chi si proponet de balorizzare sas iscolas e sas comunidades locales de donzi parte de s’Italia. Cust’annu, s’initziativa arribat a s’edissione 24, mustrande sa continuidade e s’importantzia de custu addobiu chi si faghet donzi annu.

Accanta a su presidente de sa Repubblica , at essere presente puru su Ministru de s’Istrutzione e de su Meritu, Giuseppe Valditara. Su ministru Valditara at a tennere s’occasione de illustrare sas politicas de s’educassione e sas refformas chi ant essere prenettadas po mezzorare semper de pius su sistema iscolasticu italianu.

Sa tzerimonia si at a tennere in su archidosu Convitto Nazionale de Casteddu, chi est in sa carrela Pintus. Custu seberu no est unu casu, pro itte su Convitto Nazionale est una istitutzione istorica e de gabbale mannu in sa vista educativa sarda e natzionale.

Sa notissia de s’abbertura est bistada comunicada cun braga dae su Rettore de s’Istitutu, su professore Paolo Rossetti, chi at espressadu sa suddisfasione sua po su riconnoschimentu de importu retzidu dae su Convitto Nazionale. Su professore Rossetti at evidentziadu commente custu abbenimentu siat un’occasione unica po evidentziare su tribagliu fattu dae s’iscola e po affortigare semper de pius su ligonzu cun sas istitussiones.

S’abbertura de s’annu iscolasticu 2024-2025 in Casteddu at essere duncas unu momentu de festa e meledu, un’occasione po tzelebrare sos sutzessos accattados e po rennovare s’impignu po un’educassione semper pius incluisiva e de calidade. Sa presentzia de sas carrigas pius artas de s’istadu, est una testimonia de s’importantzia chi benid dada a s’istruzione e a su rolu fundamentale chi isboddiat in s’isviluppu de sa sotziedade e in su tempus benidore de s’Italia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa Grutta de sa Pipera de Casteddu, intre istoria e paristoria.

A pagos passos dae su tzentru de Casteddu, accanta a sa carrela chi che leat a su campusantu de Tuvixeddu, si agattat unu de sos monumentos pius ammaghiantes e prenos de misteru de sa tzittade:sa Grutta de sa Pipera. Est unu sepurcu romanu iscavadu in sa rocca, de su I° seculu d.C., divennidu tzelebre no solu po sa bellesa architettonica sua ma fintzas po sa paristoria chi lu inghiriat.

Sa tumba fuit bistada fatta fraigare dae Lucio Cassio Filippo, nobile romanu chi arribaiat dae Cartagine, po sa muzzere Atilia Pomptilla, morta in Casteddu in su mentres de su disterru de su maridu. Sas iscrissiones intro de su sepurcu contant un’istoria de amore e devossione: secundu su connottu, Pomptilla diat aere donadu sa vida sua a sos deus po sarbare cussa de su maridu, chi si fuit ismalaidadu in su mentres chi fuit in Sardigna. Ma su chi rendet sa Grutta ancora pius enimmatica est sa presentzia, isculpida in sa fatzada, de duos terpentes imboligados.

Dae inoghe naschet su nomene “Grutta de sa Pipera”. In su tempus, a inghiriu de cussas friguras sun bennidos a pizu paritzos contos populares. Bi est chie at interpretadu sos terpentes comente conas de eternidade e protessione de s’anima de sos mortos, atteros bi ant bidu unu zubilu a sos cultos de s’antiga Roma o unu signu magicu capatze de che istesiare sos ispiritos malos.

Oe sa Grutta de sa Pipera est unu de sos logos archeologicos pius bisitados de Casteddu e sighit a esercitare un’ammaju forte supra sos bisitadores. S’aera sua suspesa intre contu e istoria, s’amore eternu chi ligat Pomptilla e Lucio Cassio Filippo e s’aria de misteru de duos terpentes isculpidos in sa pedra faghent de custu logu una cona de sa tzittade, capatze de contare no solu unu picculu de s’istoria romana sua ma fintzas sa fortza chi non morit de sas paristorias chi resistint a su tempus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22