S’immensu patrimoniu de musica e cultura sarda at acciappadu vida noa gratzias a s’inscansabbile impignu de s’Accademia de Musica Sarda chi at preservadu e valoritzadu sa ricchesa de sas registratziones costoidas in su gai nomenadu “Fundu Pino Lai”.

Custu istravanadu archiviu, fattu de 3.600 cassittas de musica, est una prenda chentza cunfruntu, unu ponte derettu a sas artas raighinas de s’usantzia poetica a boghe de sa Sardigna. Sas naschidas de custu istravanadu archiviu arribant dae pius de 70 annos de passione e deditzione dae parte de Pino Lai, unu collessionista appassionadu, chi at accorradu cun sapientzia custas pretziosas testimonias de su passadu, in medas annos.

Torradu a battizzare in onore sou, su Fundu Pino Lai est unu pilotto fundamentale po cumprendere e
preservare sa ricca tessidura culturale de sa regione. Sas registratziones intro de custu archiviu, abbratzant unu tempus mannu meda, passande dae sos annos ‘50 po arrivare a su 2010, e apparant una ventana unica supra sas varias espressiones de s’arte poetica de sa Sardigna.

In mesu de sas andalas fittas supra custa cassittas, si podent agattare cantones de su connottu, versadas a tema, mutetos, arrepentinas e in pius, sas crispas e appassionadas garas poeticas, inube disputtadores chi teniant talentu meda, si disaffiant supra de temas seperados dae sa fantasia oppuru seperados dae su pubbricu.

Su valore de custu Fundu non si podet calculare, pro itte non si allindat solu a su valore annantu de sa musica e de sa poesia, ma arribat puru a su signifficu istoricu e de s’istudiu de s’omine. Onzi cassitta de musica, curada cun pretzisione dilica dae Pino Lai, est unu beru cassione de pretziosas notissias: dae sas datas e dae sos logos de sas registratziones, a sos nomenes de sos autores, a sa classificatzione de sas garas e puru a sos temas trattados in sas garas.

Gratzias a s’azzudu de Unica Radio, custu istravanadu patrimoniu est bessidu a fora, coffuzinde a meda zente de si affundare in sa fundaria de unu connottu betustu, chi sighit a drinnire cun intensidade in su coro de s’isula. S’opera de bardiada e balorimentu, fatta dae s’Accademia de Musica Sarda, assumit duncas unu signifficu detzisivu po preservare s’eredidade culturale de sa Sardigna e po la cussinnare a sas ingendras de su tempus benidore, in manera chi potant issas puru arregossiare de sa bellesa de custu istravanadu connottu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22