LIFE Safe for Vultures, su disignu ambitziosu chi si proponet de garantire s’iscampamentu po unu tempus longu meda de sa populatzione de Benturzos in Sardigna, est arribande a unu momentu detzisivu e chi ichendet. Paris a sas comunidades de su logu, chi sunt derettu interessadas, espertos de tottu su mundu,operadores de su campu, appassionados e sas organissasiones pubbricas, sos chi partetzipant a su disignu, tzelebrant unu de sos risurtados pius importantes.

Custu abbenimentu no est solu unu puntu de arribu, ma marcat puru s’incumintzu de unu momentu nou in s’impignu po podere costoire custa ispetzie conica.

Su prossimu martis 16 de aprile, cummintzande dae sas 10.30 in s’apposentu apparitzadu gratzias a sa gentilesa de su Comune de Villasalto in su mesudie de sa Sardigna, bi at essere unu abbenimentu pubbricu de importantzia meda. Ant essere torrados a biere sos puntos de fundamentu, chi ant permittidu custu risurtadu de carraffale: at essere illiberadu su primu ballumene de benturzos in cussu logu.

Custu momentu, non solu est unu signu de sutzessu po s’impignu chi tottu paris ant postu, e chi est duradu annos, ma evidentziat puru s’importantia de sa coperassione de partes divressas chi tenent interessiu, po diffendere sa diversidade biologica de su logu.

Sa presentzia de espertos de tottu su mundu, paris cun sas comunidades de su logu e sos amigos de sos benturzos, una retza chi est semper creschinde de volontarios chi si sunt dedicande a custa cajone, evidentziat sa galabera e s’impignu ispartos in tottu su mundu, po salvare custa ispetzie minettada. In su mentres de s’abbenimentu, ant essere postas supra de sa mesa, esperientzias, connoschentzias e isbirgos po garantire una conduida chi potat agguantare sa popolatzione de sos benturzos, non solu in Sardigna, ma puru in atteras partes de su mundu, inue custas magniffigas creaduras ,accommetant isfidas commente custas.

S’addobiu at essere puru un’occasione po addulgare su rolu de fundamentu de sas comunidades locales e de sos volontarios po su sutzessu de custu disignu. Su custante impignu e sa dedissione insoro, ant permittidu de arribare a cumprire custu disignu e apparant un’isperantzia chi si podet toccare cun sas manos po su tempus benidore de custa ispetzie. Po mesu de sa collaboratzione de sos tzittadinos e s’accottu de sa parte pubbrica, de sas organissasiones de de sos singros podimos sighire a diffendere e conservare su patrimoniu de sa natura de sa Sardigna e de su mundu intreu.

Po congruire, s’accadessimentu de su 16 de Aprile est unu momentu de tzelebrazione e de meledu supra sa carrela fatta e sas isfidas de su tempus benidore. Est puru un’occasione po s’impignu de ponnere tottu paris po conservare e faghere cosas pratigas po garantire chi su benturzu e atteras ipsetzies debiles, pottant sighire a bolare. Custu est solu
s’incumintzu de unu percursu longu chi at a dimandare atteru impignu, collaboratzione e determina, ma est puru unu momentu po abbaidare a daenanti cun isperantzia e cunfiantza po unu tempus benidore, in su cale su benturzu e tottu sas meravizzas de sa natura pottant prosporare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22