Barumini, cun sa nomenada sua zura archeologica Su Nuraxi, sighit a esercitare unu ammaju chi non si podet resistire supra de sos turistas frantzesos, tantu chi in su mentres de su rechente Salon Mondial du Tourisme, in su Paris Expo Porte de Versailles, su bancu de sa Fundassione Sistema Cultura dedicadu a sa zura archeologica de su mesudie de sa Sardigna, at tentu unu interessiu carraffale in sos visitadores chi arrivaiant dae sa Frantza.

Custu logu de esposissione est bistadu sa sola presentzia de sa Sardigna intro de tottu sa manifestassione, mustrande cantu su patrimoniu culturale de sa Sardigna siat capatze de acciappare s’attentzione internatzionale.

Sos turista frantzesos, in manera particulare, sunt sa parte pius manna de sos visitadores in sos logos archeologicos commente Su Nuraxi o su Museu de sa Domo Zapata, bogande a pizu unu interessiu semper pius mannu po sas bellesas istoricas e naturales de s’iscrocca sarda cando benint innoghe in vacantzia.

Sa zura de su bancu est bistada semper prena de zente chi tenet interessios in su campu de su turismu, appassionados de istoria e de archeologia, chi si cherent affundare in s’istoria antiga de sa Sardigna e de ammirare su mannosu cumplessu nuragicu, chi at bidu su primu importante iscavu iscientificu dae parte de Giuanne Lilliu in sos annos ’50.

Sas dimandas e sas curiosidades chi interessant su situ e su monumentu antigu, arrodadu dae turres mannas, muros maestosos e dae s’antiga bidda de barraccas, sunt bistadas paritzas e appassionadas, testimonia de s’interessiu chi non si podet creere, chi custu patrimoniu bogat in su pubbricu internatzionale.

Custu abbenimentu est un’opportunidade manna po Barumini e po totta sa Sardigna. Su Salon Mondial du Tourisme, cun sos suos 200 esposidores chi arribant dae tottu su mundu, at fattu arrivare 66.000 visitadores, apparande una vetrina pretziosa po promovere su patrimoniu riccu de cultura e de natura de sa Regione.

Sa intzidida a sa manifestassione, at permittidu de faghere creschere sa connoschentzia de Barumini e de Su Nuraxi a livellu internatzionale,afforticande sa fama de sa Sardigna, commente una destinassione turistica de sas primas po sos amantiosos de s’istoria, de sa cultura e de sa bellesa de sas vistas.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22