Su Job Day in Tortule’ at signadu unu triunfu po su territoriu, mustrande una cussorza chi abbaidat a su tempus benidore e ricca de opportunidades. S’accadessimentu, ordimizzadu commente sae de chimbe de unu coladorzu de s’edissione annicrina promovida dae s’assessoradu regionale a su tribagliu e dae s’ASPAL in s’istitutu Janas IPSIA, at postu in lughe tottu sas possibilidades de s’Ozzastra, una bera prenda chi si est annodditande sempere de pius in sa bista de s’economia de sa Sardigna.

Cuncentrandesi supra su turismu de calidade, s’agroalimentare de eccellenzia, sa marineria e sas attividades de s’industria, s’iscrocca at mustradu de tennere bases fortes po sa creschida, cun su portu e s’aeroportu chi sunt elementos netzessarios po s’isviluppu.

Sos numeros alcansados in custu accadessimentu testimonzant su sutzessu: 104 dittas chi ant partetzipadu, de sas cales 53 presentes, chi ant pubbricadu 424 abbisos cun d’unu totale de 2.762 postos apparados: Sos numeros, faeddant a sa sola cun 750 iscrittos a su portale e 1.330 candidados presentados, cun 450 negossios programmados e paritza appillada ispontanea de pessonas in tottu sa die.

Sa presidente generale de s’Aspal, Maika Aversano, at postu in evidentzia itte cheret narrere custa” iscommissa binchida”, evidentziande s’efficentzia annoada de su territoriu e s’importantzia de sos addobios cun sos chi dant tribagliu e sos chi lu chircant. S’accadessimentu at puru apparadu non solu occasiones de tribagliu, ma puru sa possibilidade de baludare sa cumpetitividade de donzunu in su mercadu de su tribagliu, e de assebertare camminos de formatzione e iscoperrere ideas noas e ispirassiones.

Sa presentzia de rappresentantes de sas Universidades de sa Sardigna, de sas iscolas tecnicas prus mannas e sas istitussiones, e puru sos chi rappresentant sas fortzas Armadas, at arricchidu s’accadessimentu, abberinde fundales novos a sos istudentes e a sos chi sunt in chirca de tribagliu.

Unu momentu ispetziale meda est bistada sa lezione chi at fattu Matteo Flora, mere de una ditta, chi est professore in s’Universidade e espertu de intelligentzia artifissiale. Sa presentada sua, supra sos temas de su storytelling e de sa cybersicuresa e su data driven, at attiradu s’attentzione de una platea allibrada dae s’esprientzia sua manna abberu e dae sa capatzidade de cundividere connoschentzias praticas meda fungudas.

Su sutzessu de su Job Day de Tortulè bisonzat de lu biere in d’unu cuntestu pius mannu, cun sas bocadas a campu chi ant giai toccadu atteras tzittades importantes de sa Sardigna, commente Tattari,Terranoa,Nugoro e Aristanis e chi si ant a congruire in Casteddu su 26 e 27 Martu in sa Fiera. Custos accadessimento mustrant un’opportunidade detzisiva po sa creschida de s’economia e de sa professione de sa regione, mustrande sas possibilidades e abberinde afficcos novos po sos abitantes.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22