Una disgrassia dolorosa in su logu de tribagliu, est sutzessa in d’unu cantieri,de Terranoa,inue fini fraigande dommos, e at bantzigadu in manera arta sa comunidade locale. Baskim Bitichi, un’omine de 43 annos chi fit naschidu in su Kosovo, est mortu in manera tragica meda.

Secundu cantu ant contadu sos cumpanzos suos, Bitichi fit bistadu obbrigadu a si leare una pasa dae su tribagliu po duos meses, pro itte aiat tentu una disgrassia pagu tempus e a denanti, ma aiat dezisu de andare su mattessi in su cantieri, po discutire paris cun issos.

Cussu chi teppiat essere un’addobiu gavacciu, si est trasformadu in d’unu ammuttu, cando Bitichi est pigadu supra unu de sos pontaggios e at perdidu s’ecchilibriu ruinde in su boidu dae un’artaria de casi 10 metros, cun cunseguentzias mortales.

Sas autoridades e sos carabinneris e sa Polizia, ant cumminzadu de presse un’iscrucculla po faghere lughe supra sas occasiones chi ant juttu a custa disgrassia chena perunu sensu, in d’una de sas pius importantese tzittades de sa Sardigna.

Est bennidu a pizzu, chi, bell’e chi sos cumpanzos de su mortu, no esserent impignados derettu in tribaglios in su cantieri, cando est sutzessa sa disgrassia, fini in donzi manera presentes in cussu logu. Sa testimonia insoro at essere fundamentale po cumprendere si bi pottat essere bistada carchi cosa chi pottat aere dadu unu contributu a custa
disaura, po chircare de prevennere disgrassias commente custa in su tempus benidore.

Sa perdida de Bitichi, at dassadu unu boidu chi non si podet cumprendere in sa comunidade de sos tribagliadores de Terranoa, mentres amigos, familiares e cumpanzos de tribagliu, si unini in su dolore, po cummemorare sa memoria sua e dimandare giustissia e craresa supra de cussu chi est accadessidu. Sa sicuresa supra de su logu de tribagliu, addurat una prioridade fundamentale, e custa disgrassia, est commente una giamida apprettosa meda, po un’attentzione annoada e dispostas pius fortes po diffendere sos chi dedicana sas dies insoro a fraigare su tempus benidore.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Elettrocavu Luvula-Garteddi, sighint sos tribaglios de Terna: imbestimentu de 50 miliones po mezorare sa retza elettrica.

Sighint sos tribaglios de Terna po fraigare su Elettrocavu novu cun cavu sutta de terra longu 19 kilometros chi at a collegare sas cabinas primarzas de Luvula e Garteddi. S’opera faghet parte de sos interventos po affortigare sa retza elettrica locale e at a permittere de la faghet divennere prus balente e sigura. Pro faghere sos tribaglios, sa sotziedade at imbestidu casi 50 miliones de euros. Su collegamentu novu at a dare sustentamentu elettricu in prus a sa cabina primarza de Garteddi chi oe est collegada a sa retza elettrica natzionale po mesu de unu solu elettrocavu.

Pro cantu pertoccat sos tribaglios, los sunt faghinde in sa carrela provintziale 25 e sos cantieris de su lotto 1 e 2 in su trettu chi andat dae su’iscansada de Luvula fintzas a Garteddi. Sos tribaglios sunt andande a daenantis segundu su programma chi si prevediat. Una prima parte at essere finida intro lampadas 2026 mentres
sa fine de sos tribaglios si prevedit intre sa prima metade de su 2027. In su mentres de sos tribaglios po garantire sa siguresa est bistadu netzessariu istringhere sa carrela faghinde passare sas macchinas cun su traffigu regoladu dae unu semafforu.

A sa congruida de sos tribaglios sa sotziedade at a torrare a faghere s’isfaltu in tottu su trettu de sa carrela interessada dae su cantieri. S’abberu de s’opera est bistada deffinida po mesu de unu caminu de cunfrontu cun sas amministratziones locales. In sos primos mamentos su trassadu de su cavu interradu est bistadu istudiadu imparis cun sos entes interessados cun s’intentu de minimare cantu prus est possibile problemas po s’iscrocca e s’ambiente e rispettare sas esigentzias de sas attividades de sa laurantza. S’elletrocavu novu at a passare mescamente accanta a atteras operas chi giai esistint comente carrelas istatales e provintziales minimande sas intromissiones cun sas zuras de majore balore naduralisticu e de bista de sa zura.

Custu interventu est unu passu importante po affortigare sa retza elettrica de s’iscrocca cun beneffissios isettados po sa continuidade de su servitziu e prus siguresa in su faghere arribare prus energia po sas comunidades locales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22