Jacopo Cullin, attore nodidu e regista sardu, si est approntande po torrare triunfante supra su cataffale, cun s’ispettaculu acclamadu sou “Est inutile a lu narrere!,”. Mentres si preparat a torrare a interpretare su rolu de s’agente Lello Esposito, in sae trese istagiones de sa serie popolare “Sas scruccullas de Lolita Lobosco”, Cullin abbisat sas fases de su giru sou beranile. Ammentammos chi s’annu passadu, cust’ispettaculu at registradu su prenu po donzi data.

Pustis de su sutzessu accansadu in sos teatros de sa Sardigna e supra de importantes cataffales natzionales, commente s’Ambra Jovinelli de Roma e su Teatru Manzoni de Milano, Cullin at a giughere un’attera borta, s’ispettaculu sou in giru po s’Italia. Su giru at incuminzare su 2 de Maju a su teatru Eliseo de Nugoro, e ada a sighire a su Teatru Verdi de Tattari su 4 de maju e si at a congruire a su Teatru Liricu de Casteddu su 16 de maju.

Cullin narat:” Pustis meses de isettu, semus baccheos de torrare in iscena. Po meda zente, maju, est su mese de s’isfogu, ma po nois est su mese de s’allegria.” A costazu de Cullin, su fidadu cumpanzu sou de cataffale, Gabriele Cossu, paris cun sa talentosa trinca musicale, cumposta dae Matteo Gallus a su violinu, Riccardo Sanna a s’organeddu e Andrea Lai a su contrabbassu.

“Est inutile a lu narrere!” est bessidu in su 2018 e dae tando at incantadu su pubbricu cun sa brullania sua e sa delicada comicidade sua. Po mesu de sos personaggios brullanos suos, e chi commo sunt diventados de
usantzia comune, puru in mesu de sos giovanos – Segnore Tonino, Sarbadore Pilloni e Angioletto Biddi ‘e proccu- Cullin iscumbattit s’isviluppu de sa relata de sa sotziedade de oe, poninde in evidentzia sas debilesas e sas isfidas de s’essere umanu in d’unu mundu, dominadu dae sa precariedade e dae sa crisi esistentziale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22