Torrana supra de su cataffale de sa musica italiana, po contare su presente, cun sa oghe insoro affilada e s’armudiu chi istrasinada. Sos Istentales, sa truppa etno-pop de sos massajos e pastores pius accramados de sa Sardigna, torrana cun “Zustissia Mala”- Libertade negada” una cantone de Gigi Sanna, su grande capu de sa truppa, chi contat sa dolorosa muda zuditziaria de Beniamino Zuncheddu, chi at passadu 33 annos in presone, po s’istragu de Sinnai de s’8 de bennarzu 1991, in sa cale tres vidas sunt bistadas segadas, e una sola fit iscampada po meraculu, diventande testimonzu crae, de cussa disgrassia, cunfidande de essere bistadu cunbinchidu dae unu de sas fortzas de s’ordine a
reconnoschere issu commente s’assassinu.

Po mesu de sa boghe intrante de Gigi Sanna e sas notas chi abbortigana de Davide Guiso,”Zustissia Mala- Libertade negada” si pesat commente unu affissu appassionadu e unu donu a un’omine chi at pagadu su prezziu pius artu: perdere sa libertade. Sos Istentales, dae sempere accommettana sos temas pius buddidos de sa Sardigna: secuestros de pessones ,emigrassione, vindittas, ingendrande cun arrenegu e cun attuamentu sos dannos mannos chi cajonant a s’immagine de s’isula.

Su nomene Istentales, no est una tradussione a sa littera, ma ammentat sa figura de un’istedda de sa costellazione de sos bastones de sos tres Res, chi unu tempus fit usada dae sos pastores e dae sos massajos, commente ghia po sa semenadura. Est sa prima istedda chi bessidi a su inchinadorzu e s’urtima chi si che andada a s’arbeschida, simbulu de isperantzia e orientamentu.

In 25 annos de attividade, sa truppa nugoresa, at fittadu medas cantones e at giuttu sa musica sua in giru in sas presones in Sardigna e puru in su restu de s’Italia, arribande in logos commente Spoleto ,Casteddu, Milano,
Padova, Volterra, Tattari e Nugoro. Ant puru pubblicadu unu libbru chi chistionat de s’esperienzia de sa presone,trasformande sa musica insoro in d’unu mediu de fughida e de isperantzia.

In sos annos, sos Istentales ant tribagliadu puru cun artistas famados meda,commente Nomadi, Vecchioni, Finardi, Bertoli, Tullio De Piscopo, Modena City Ramblers, Elio delle Storie Tese e Cristiano De Andrè. Sa truppa, cumposta dae Gigi Sanna, Luca Floris a sa batteria, Sandro Canova a sa chiterra basso e Frantzisca Lai a sos cussertos, si est annodittada po sos nuntzos insoro, meda beros chi rifrettene sa vida de onzi die e sas tradissiones de sa Sardigna, chin d’una franchesa e una derettura chi corpant derettu a su coro.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Su carrasegare de Marrubiu, connoschidu commente Su Marrulleri, at alcansadu su riconnoschimentu de grandesa de “Carrasegare istoricu” dae parte de su Ministeru de sa Cultura. Custu titulu importante meda cunfirmat su balore culturale, istoricu e artisticu de s’isfilada, ghettandela in mesu de sos abbenimentos pius importantes de sa bista de su connottu a livellu naztionale.

Su Marrulleri affundat sas raighinas suas in d’una istoria de casi 45 annos, in su mentres de sa cale s’isfilada si est trasformada in d’unu abbenimentu conicu de sa cultura de su carrasegare sardu. Naschida comente espressione de creatividade locale e passione po s’arte de sa cartabista, oe sa festa est una de sas pius ispettaculares de sa Sardigna. Donz’annu, s’isfilada de punta biet s’intzidida de pius de 20 carros de cobertantza, fattos cun eccellentzia artigianale istravanada, chi arribant dae tottu s’isula.

Po animare s’abbenimentu bi sunt pius de 5mizza caratzas e unu pubbricu de pius de 20mizza pessonas, chi arribant po assistire a s’ispettaculu unicu. Su riconnoschimentu de “Carrasegare istoricu”,cunfirmat s’importantzia de preservare custa manifestassione comente parte de su patrimoniu chi non si podet toccare de s’Italia.

S’isfilada de Marrubiu, giai insertada in sos abbenimentos de interessu turisticu mannu de sa Regione Sardigna, est unu motore po su turismu e s’accolomia locale. In su mentres de sas dies de Carrasegare, sa bidda si revertit in d’unu polu de attrassione po sos bisitadores chi arribant dae donzi parte de s’isula e no solu. Sos carros e sas musicas trabentantes mustrant un’ispettaculu chi attrait non solu appassionados de connottu popolare, ma fintzas turistas chi cherent iscoperrere sa berteresa de sa Sardigna.

Unu de sos elementos chi distinghent est sa cartabista, unu connottu chi dimandat abilidade artigianale e creatividade. Donzi carru est su fruttu de meses de tribagliu dae parte de sos assotzios e de sas comunidades locales, chi ponent s’anima e su coro po fraigare operas unicas. Sos carros sunt beras operas de arte prenas de addelentu e fantasia.

Su titulu de “Carrasegare istoricu” est unu puntu de arrivu, ma puru un’incumintzu novu po Su Marrulleri. Gratzias a custu riconnoschimentu, su Carrasegare de Marrubiu at a podere tennere atteros finantziamentos chi nde podent garantire sa creschida e sa visibilidade a livellu natzionale e in tottu su mundu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22