Katia Corda e Franco Mascia, ant dadu vida a unu incantu de su Tzinema dae su titulu “Fragheterra2, unu viazzu chi ammaghiada passande in mesu a sas emossiones e sos pregiudissios chi influentziana s’attibiscione nostra de populu sardu.

Cust’opera de arte, at giai alcansadu duos riconnoschimentos de grandesa a su Vesuvius Film Festival de Napoli: su premiu commente Menzus Film e su riconnoschimentu po sa menzus affilada feminina, cunfirmande su rolu sou de primarza in su cuntestu de su tzinema in dies de oe.

Su film, iscrittu dae s’artista de Tortule Franco Mascia, chi interpretada puru unu de sos rolos printzipales, paris un s’attore Carmeli Bacchetta, est como dispostu in sa lista de grandesa de Amazon Prime, battinde cun segus su vantu de sa Sardigna autentiga.

Cun custu mediu, ant bolidu contare un’istoria chi, puru in sa semplicidade sua, dat unu nuntzu potente de consideru supra sos pregiudissios chi sunu presentes a dies de oe in sos cunfruntos de su populu sardu. Su tema proponnidu dae Franco Mascia, est bistadu su motore abbricchiu chi at ghiadu a una contassia chi faghet diventare famada e balorizat sa Sardigna, comente una terra digna de amore e rispettu.

S’intentu est bistadu cussu de dogare s’abbitudine iscurretta dada a sos Sardos dae cussos chi non los connoschene in realidade. Fragheterra contat s’istoria de Marco, nodidu commente su “Canisca”, unu bendidore abbramidu, atzudu e chena timoria. Sa personalidade sua affilada, lu faghet incarrigare dae Vittoria, una femina de affares, de comporare unu terrinu mannu meda in Sardigna, inube cheret fraigare s’impiantu pius mannu de produssione dae su bentu de s’Europa.

Mancari s’inimigantzia sua po sos sardos e sa Sardigna, Marco atzettada s’incarrigu, ispintu dae s’afficcu de unu accadessidu proffessionale. In sa abbarrada curza sua in s’isula, at a tennere manera de addobbiare Bobore e Assunta, sos meres de sa terra disizada meda, e custu addobiu chi non si podet creere ada a cambiare po semper sa’afficcu e sa vida sua.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Intre delusione e identidade: sa Sardigna in su film nou de Bonifacio Angius

Dae su 30 de santugaine imbatet a sas salas Confiteor – Comente apo iscobertu chi non dia a àere fatu sa rivolutzione, su film nou de Bonifacio Angius, unu de sos registas prus originales e coerentes de su panorama tzinematogràficu italianu de oe.

A pustis de àere otentu su Prèmiu Lizzani in sa Mustra de su Tzìnema de Venèzia pro su mègius film, seberadu dae una giuria de gestores, s’òpera torrat in sa terra chi l’at fata nàschere e chi nde prenat s’ispìritu: sa Sardigna. Sa distributzione at a mòvere dae sas tzitades prus mannas e a pustis at a imbàtere a bellu a bellu a àteras salas meda, dae nord a sud de s’ìsula.

A pustis de una sèrie de anteprimas fatas in sas tzitades italianas prus importante, dae Roma a Bologna, dae Perùgia a Firenze, su film imbatet duncas “a domo” pro si riunire cun cussu pùblicu chi prus de sos àteros podet agatare sa sustàntzia profunda de su contu in sos paesàgios suos, in sos silèntzios e in sas caras. Fatu cun s’agiudu de sa Regione Autònoma de Sardigna, de sa Fundatzione Sardigna Film Commission e de àteros sòtzios natzionales, Confiteor si presentat comente un’òpera personale meda, ma chi podet faeddare a totus.

Est unu biàgiu profundu chi aunit su privadu e su polìticu, sa memòria e sa delusione, sa chirca de un’identidade in unu tempus in ue sos sognos de cambiamentu paret chi si depant isfàghere. Cun custu film nou, Angius cunfirmat s’istile suo ùnicu: assutu, deretu, ma prenu de un’umanidade bera e de una malinconia chi apartenet a sa terra sua. Sa Sardigna, una borta in prus, no est iscenàriu ebbia ma personàgiu biu, ispigru de sos turbamentos e de sas isperàntzias de totus.

In sos ùrtimos annos, su tzìnema sardu at connotu a beru una rinàschida. Gràtzias a registas comente Angius e a una generatzione de autores bonos a aunire sa fortza de sas raighinas cun unu puntu de vista modernu, s’ìsula s’est fata puntu de riferimentu in su panorama natzionale.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”